قالوا زمان السنين بتنسي والأيام بتعالج وكله بيعدي.. وده ممكن يكون صح في أوقات كتيره .. لكن بيكون صعب في ذكرياتك مع أقرب الناس ليك..
وبالكلام عن الذكريات.. والدي "الله يرحمه" كان دايما يقولي "السيرة الطيبة" أحسن مليون مره من مليون جنيه في البنك.. السيرة الطيبة بتفضل سنين وسنين.. بيضرب بيها المثل في أوقات كتيره.. صاحبها بيكون سايب ناسه فخورين ومبسوطين.. صاحبها روحه عمرها ما بتمشي ولا اسمه بيتنسي.
الحديث عن الذكريات مع والدي مبتخلصش مش علشان والدي وحابب الناس تشوفه أحسن واحد أو تفتكره وتدعيله بالرحمه تزامنا مع ذكرى وفاته.. بس السبب نصائحه.. النصائح اللي يوم عن يوم أهميتها بتزيد.. وبعتبرها مرشد في حياتي..
-"يابني رصيد السيرة مبيخلصش ولا بيتنسي فعلى قد ما تقدر خليه كويس".
-"أعمل الواجب ومتستناش يتردلك خليك دايما سابق بالخير".
-"أهلك هم اللي باقيين مهما الدنيا جت عليك".
-"افتكر كويس إنها مش دايمة لحد وكله ماشي".
-"أعمل حساب يومك وخليك خفيف عَلِى كتاف اللي هيشلوك بعملك الصالح وسيرتك الطيبة".
-"متظلمش حد ولا تستخدم سلطتك عَلِى حد علشان لمًا تنام بليل تنام مرتاح".
والحقيقة ناس كتير كلامهم بيفرق معانا وخاصة كبار السن.. ومصطلح "كبار السن" مش دليل بس عن العمر لا خالص بيدل برضو عَلِى التجارب والخبرات اللي اكتسبوها عَلِي مر السنين.. بيدل عَلِى ناس لفت وشافت وعاشرت.. فمتسغربش لما الكبير يقولك "أنا بفهم اللي قدامي من نظرة عين".. عين الكبير فرازه وكاشفة لحاجات كتير ممكن تعدى مننا.
النصائح ديه ممكن تسمعها من الكبار.. الكبار اللي موجودين حولينا وعايشين وسطنا.. الكبار ممكن يكونوا أهل أصدقاء أو حتى ناس بنقابلهم في حياتنا صدفه ممكن نسمع نصيحة منهم تصحح حاجات كتير أوي عندنا أو تدلنا عَلِى الطريق الصح.
الخُلاصة "خُد كلام الكبار وأعمل بيه.. ده ملخصات تجارب وسنين ".
