ليه مكتوب علينا الشقا مع منتخب مصر؟ ليه منفرحش بمنتخب بلادنا زى باقى دول العالم؟ مصر كلها خلعت عباءة الدورى، وكل واحد خلع فانلة فريقه، الأحمر، والأبيض، والبرتقالى، والأخضر، وارتدينا فانلة منتخبنا علشان نشجعه، ويروح كأس العالم، ونفرح فرحة كروية غايبة عنا بقالها كتير، مفرحناهاش مع المنتخب، صحيح الأهلى فرحنا كتير بس فرحة المنتخب ليها طعم تانى.
ليه كل ماتش للمنتخب نقول مش مهم الأداء، المهم النتيجة، أنا عاوز أستمتع بلعب المنتخب بالكرة، بشوطة حلوة، بجون أحلى، بصدة تخلع القلوب، إنما اللي بنشوفه مش منتخب مصر المرعب أيام حسن شحاتة ومتعب وأحمد حسن وشوقى وزيدان، ما نشاهده شبح لعيبة، اهتموا بشعرهم وماسكات وشهم أكتر من اهتمامهم بفانلة المنتخب، المهم هيقبض كام من ناديه، ومش مهم مصر.
زمان كنا بنعرف طريقة لعب المنتخب، وكان فيه مباريات ودية ندخل فيها، دلوقتى ماتعرفش البدرى بيفكر إزاى وفى إيه، آي نعم نتائجه إلى الآن مع المنتخب جيدة جدا، لم ينهزم فى أى مباراة، ولكن هو أيضا لم يلعب مع منتخبات قوية، ولم يعدّ المنتخب ولا اللاعبين إعدادا جيدا للمباريات.
اتحاد الكرة غرقان فى مشاكله، وهو غير مدرك أنه اتحاد للعبة الشعبية الأولى، مش عارف إيه الصعوبة إننا نجيب جهاز كويس، يبقى فيه شكل وملامح للفريق، يبقى فيه خطة واضحة، ومرونة فى الملعب، فى التشكيل، والتغييرات، بدل ما احنا بننزل الملعب ونلعب بخطة باصى للى جنبك لو لاقيته.
كان منتخب مصر بيخض أى فريق، دلوقتى شوفوا المنتخب فى آخر مباراتين أمام إنجولا والجابون أصبح شبح، لا روح، ولا لعبة حلوة، أنقذوه قبل كأس العالم وأمم أفريقيا، خلونا نفرح بمنتخب بلادنا.
