تعشق الجلود والهاند ميد منذ صغرها، وتحلم بإطلاق خط إنتاج ومصنع مصرى للمنتجات الجلدية، ومن خلال مبادرة الست المصرية لتعليم السيدات.
انطلقت تقى عبد الرؤوف مصممة الجلود ابنة محافظة الشرقية لتصبح اول سيدة فى المحافظة لها براند خاص فى صناعة الجلود وتسوق منتجاتها بالخارج، كما أنها مدربة ولها ورشة خاصة بها لتصنيع المنتجات الجلدية.
وتقول تقى: «عمرى ما فكرت اشتغل بالعكس كنت باشجع كل ست انها تقعد ف البيت طالما مش محتاجة دخل لكن قررت ان ابدأ حياه جديده فىها هدف وابقي فرد بينتج مش بس بيستهلك واتعلمت صناعة الجلود ،وبدأت أسافر يومين كل أسبوع للقاهرة عشان اتعلم واخد كورس، واليومين دول كانو صعبين جدا نظرا لصعوبة حمل ونقل الأدوات والمعدات والجلود نفسها لكن كنت اشعر بفرحة وان مشوار جديد من حياتي بدأ ،وما شجعني لاحتراف مجال تصنيع الجلود مبادرة الست المصرية وصاحبتها رحيمة الشريف».
وأضافت مصممة الجلود انها بدأت التدريب اكثر وتطوير ذاتها والتركيز لتتمكن من عمل منتجات جلدية مميزة ومختلفة وهنا اختارتها رحيمة الشريف مؤسسة مبادرة الست مصرية لتصبح مدربة فقامت بإعداد اختبار لها وهو ان تقدم لها أحد المنتجات فى خلال نصف ساعة بدون أدوات وهو ليس اختبارا فقط لقياس مدى دقة وجودة المنتج إنما ايضا هو قياس للقدرة على التصرف ومواجهة الأزمات فى ظل غياب الأدوات اللازمة وبالفعل نجحت ،وعرضت عليها رحيمة ان تصبح مسئولة عن محافظة الشرقية وتدريب سيداتها من خلال المبادرة ووافقت وتخرج على يديها العديد من السيدات.
وتابعت»: من خلال المبادرة تعلمت صناعة محفظة وشنطة وبورتيفىة وأكتر من باترون للشنطة، وكمان بنطور من نفسنا وبنعمل براويز وسجاد ومفارش من الجلد الطبيعى والهاند ميد،وانا بقى ليا ورشتي الخاصه بيا وإنتاجي اللي بيلاقي إعجاب من كل اللي بيشوفه ويمسكه وحاليا شغلي كله اون لاين وممكن انزل معارض وبصدر منتجاتي للخارج، ومقدرش افتكر كام قطعه عملتها بس إنتاج متواصل، ومبادره الست المصريه مبتاخدش اي دعم من أي جهة ولكن طبعا رحيمه الشريف مؤسسة المبادرة تم تكريمها فى اكتر من مكان واهمهم فى مؤتمر مؤسسة أخبار اليوم الاقتصادي وجهاز المشروعات الصغيرة ومتناهيه الصغر واللي بيحاول قدر المستطاع انه يقف جانب المبادره ويدعمها.
