روت «ليلى محمد » ضحية التحرش المعروفة باِسم فتاة العمرانية إعلامياً تفاصيل تعرضها لواقعة التحرش أثناء عودتها من الدرس قائلة: كنت راجعة من الدرس وأنا في ثانوية عامة وأثناء سيري في الشارع فوجئت بأحد الأشخاص يسير بجواري بسيارته واعتدى عليا لفظياً بألفاظ خادشة للحياء..قال لي كلام فظيع مش كويس .. وحاولت تجاوزه وإكمال سيري.
وأوضحت «ليلى محمد» ضحية التحرش في مداخلة هاتفية خلال برنامج «كلمة أخيرة» على شاشة «ON» قائلة: وعندما حاولت سؤاله بعد سبي، قلتله حضرتك بتكلمنى أنا؟ فوجئت بيه ضربني بالقلم على وشي.
وأكملت «ليلى» كنت خايفة أوي منه وقررت منزلش الشارع تاني وقتها، صحيح تعرضت لمعاكسات قبل كده بس المرة دي كانت سباب وشتايم وضرب على وشي ووقتها أصبت بالصدمة والذهول إزاي أنضرب؟ ومعرفتش اتصرف؟ لكن صاحبتي ساعدتني وأخذت رقم العربية.
وحول ردود أفعال الشارع وقتها قالت: سألوه إنت بتعمل كده ليه ؟ وهدوه ومشوه ورغم أني بنت المنطقة بس ماحدش وقف جمبي.
وتابعت، بعد ما صاحبتي صورت رقم العربية قلت لماما و أخدت بعضي ونزلت أعمل محضر في القسم بتشجيع أمي وأبويا وأصحابي.
وأكدت أنها كانت مرعوبة من الواقعة قائلة: قلت لنفسي لو الشخص ده ما تقبض عليه الشخص ده هيكرر فعلته معايا ومع بنات تانية واكيد عملها.
وحول مشاعرها بعد القبض عليه قالت: مكنتش متخيلة يتقبض عليه بسرعة وبشكر كل اللي دعمني ووقف جمبي وبشكر كل الناس واصحابي واهلي والشرطة.
ووجهت رسالة للفتيات اللاتي يتعرضن للتحرش قائلة: متسكتيش هيتجاب حقك وما تخافيش كنت الاول زمان بخاف أتكلم في مثل هذه المواقف لكن المرة دي تحركت ومقدرتش اسكت بعد ما مد يده علي وما توقعت ده أبداً.
«ليلى» ضحية التحرش .. وشهادة اعتراف بنجاح الدولة ضد المتحرشين وسرعة القبض عليهم
