نادى برهان بلبل المدام فيكى بعد أن سمع برطمتها عالية من الداخل، فيفييى يا فوفااا.. مالك يا فوفو ذعلانة ليه، كشرت فيكى أكثر وضربت بوز البطة وولعت سيجارة سُخنة وقالت: "هو انت مش سامع اللى هايحصل.. فوايد البنوك هاتقل"، وسكتت.. فرد السيد برهان بهدوء استفزها: "على بركة الله.. لكن أنا اذاى محدش بلغنى بالموضوع ده، انتى ذعلانة أوى كده ليه، دى ثياثة نقدية يا حبيبتى، محدش هايغريها عشان خاطر عيونك، وبعدين لما الفايدة تقل، الاثتثمار يذيد، والدولارات ترفرف علينا والبلية تلعب، فرفشى كده يا فوفوو، ثدقينى دى تبقى فرثة العمر، طب ياريتهم عملوا كده من ذمان"..
بحلقت عينا فيكى وطقت شرار، وردت: "ماهو اللى ايده فى المية مش زى اللى ايده فى النار، وبعدين فين الفرصة هنا؟".
لمعت عيون السيد برهان فى لحظة، وتحول فجأة الى شخص آخر، وقال: طبعا فرثة.. طب فكرى براحة.. لما الفايدة تقل الناث تذعل، ولما يذعلوا يثحبوا فلوثهم، ولما يثحبوها يودوها فييين، يجيبوهالنا احنا بقى، عارفة يا فوفا أنا حاثث ان اليومين اللى جايين دول ربنا هايكرمنا وهاتذهذه معانا أوى
ردت فيكى: ويجيبوهالنا ليه بقى؟
فنظر اليها السيد برهان بنظرة متحرشة وقال:احنا نشغلها لهم، نثتثمرها اطمنى الحكاية ثهلة، ديتها جلابية قصيرة، وشوية ميك اب كده، وكله يبقى ذى الفل، ثحيح.. انتى كمان يا فوفو لازم تغيرى اللوك بتاعك شوية، اليونيفورم مثلا الفترة اللى جاية يكون اثدال طويل مايبينش منك غير حواجبك وورموش عنيكى الدوبلِ دول.. ادينى قلم الحواجب بتاعك يا فوفو، عارفة لو ركذتى معايا شوية هناكل لوذ!
هزت فيكى رأسها وسألت السيد بلبل: طيب هانعملها ازاى دى يا برهان بيه؟
ولا حاجة أبدا، هانبعت نشترى علبة بخور، وبرواذ كبير مشغول ثيرما، على كام جلابية، والبوفيه يقدم جنذبيل وينثون وبلح ومهلبية.. ونقول ان فايدتنا أحلى، توصل لحد 3 أضعاف البنوك، وبث يا ثيتى.
مسحت فيكى دموعها بينما كان السيد برهان بدأ يرسم زبيبة كبرى فى جبهته بقلم حواجبها، وقالت: وبعدين يا بلبلتى.. الناس هاتصدق؟
فتحرش برهان بعينيه أكثر، ورد: اطمنى يا حبيبتى هما متعودين يثدقوا، وبعدين احنا هانقول اننا بنثتثمر فى مناجم الدهب فى فنذويلا، ونلم لنا قرشين كويثين فى كام يوم، وهوب نعمل باى من الطيارة على ثويثرا، عملية ثليمة يا روحى، واللى يحثلنى يكثرنى!
