احدى شركات الاتصالات فى مصر شركة عزيزة وغالية على المصريين كلهم وأقصد بكلمة غالية هنا المعنيين ، غالية كقيمة معنوية ، وغالية فى تكلفة الخدمة .. لوبلعنا السعر الغالى.. وماله مافيش مشكلة فى سبيل تقديم خدمة إنترنت أرضى ذات مستوى عالى ولكن مع الأسف ...مافيش عميل واحد من عملاء الشركة لم يعان الأمرين، سواء من بطء الخدمة ، أو من انقطاعها أكثر من مرة فى اليوم الواحد ، وكل يوم .. ولن أحدثك عن خدمة العملاء والدعم الفني، العاجزين عن فعل أى شىء مفيد سوى إعطاء العميل حقنة البنج المتعارف عليها اوالجملة المستهلكة دائما وأبدا... اقفل الراوتر وافتحه تانى !!
ويظل العميل على حاله يعانى من خدمة بطيئة ومتقطعة .. وقد أطلت السخرية برأسها عندما خرجت علينا شركة الاتصالات بكل فخر لتعلن فوزها بجائزة اسرع انترنت أرضى فى شمال أفريقيا !!
وهو مين بالصلاة على النبى كان قال إن دول شمال أفريقيا عندهم النت طلقة مثلا؟واحنا تفوقنا عليهم !!
ولا ايه الجايزة دى أصلا ومين اللى وزعها ؟
ولا هو المفروض العملاء لما يسمعوا عن الجايزة رضاهم عن الشركة هيزيد؟ يا سادة... دى خدمة ملموسة .. اذا كانت كويسه هنعرف .. سيئة برضه هنعرف ولن تخدعنا أى جائزة مهما كانت .. ولا اقولكم مش عاوزين جوايز على مستوى شمال افريقيا ..ولا جنوب افريقيا .. عاوزين الشركة تطلع المركز التانى اوالعاشر او حتى العشرين على مستوى أوروبا ..
) اوروبا مش افريقيا .. طبعا مافيش مقارنة ( وعلى رأى المثل ان تكون فردا فى زمرة الأسود .. خير لك من أن تكون قائدا لسرب من النعام .
فهذة الشركة نتمنى أن تواكب التطور التكنولوجى العالمى والتحول الرقمى المنتظر بعد انتقال الحكومة الى العاصمة الإدارية الجديدة خلال هذا العام والذى يتطلب منها ضخ استثمارات هائلة وأداء محترفا .. وأن تحظى الشركة بريادة عالمية حقيقية .. وليست ريادة شمال افريقية .فياريت . تخلوا طموحكم عالى .. وأداؤكم عالى .. وسعركم .. والنبى ما يكونش غالى .
