أعرب خالد مصطفى، صاحب فكرة إنشاء أول حديقة لذوي الاحتياجات الخاصة في الشرق الأوسط،عن سعادته بإنجاز فكرته على أرض مصر، موضحًا :«الموضوع جه صدفة، وبعتبره من الأقدار الجميلة إن الواحد يحقق حلم لحد بالشكل ده.. الفكرة كانت من طفل كنت بلعب معاه شطرنج».
وقال مصطفى، خلال مداخلة عبر تطبيق زووم، ببرنامج صباح الخير يا مصر، الذى يقدمه الإعلامي محمد الشاذلي، على القناة الأولى والفضائية المصرية: «كنت في وقت بلعب شطرنج مع طفل من ذوي الاحتياجات وهو قاعد على كرسي متحرك، وكان سنة في حدود 10 سنوات، والكلام ده كان من سنة تقريبا، وكان والديه قاعدين معاه، والحديث والحوار اللي دار بينا أثناء اللعب إني بقوله سعادتك أكيد بتلاقي السعادة في الشطرنج، قالي لا يا أنكل أنا بصراحة بحب وشاور على المكان اللي فيه المراجيح بس مش عارف، ومش لاقي غير الشطرنج والألعاب الإلكترونية بس اللي أقدر ألعبهم، وكلمة الطفل لمست وجداني وقررت أساعد ذوي الاحتياجات الخاصة».
وأكد: «الفكرة جاءت من الطفل أدهم ومن أحلامه، في إنه يمارس حياته الترفيهية اللي بيمارسها أي طفل، وأقل حاجة بيفرح بيها الطفل هي المرجيحة، فكرنا وبعد كده أحد أصدقائي رئيس لجنة المشروعات في النادي اللواء صلاح عيد، تحمس جدا وأخد على عاتقه فكرة تصنيع وتنفيذ القطع والألعاب الموجودة في الحديقة هنا في مصر، وده أول تنفيذ لها هنا في مصر والمنطقة».
