طريق النور

أنا وزمانى

محمد أبوذكرى
محمد أبوذكرى

قالولى  أن زمانك كان
كداب وقاسى
صدقتهم ومشيت وراهم وبعت
ليهم راسى
وعشت معاهم كدبى وكدبهم
وقتلت فى السكه حماسى
ونسيت أهلى وعزوتى وأحبابى
وأصحابى وناسى
ونسيت كمان علمى وحلمى
وكتابى وقلمى وكراسى
وبعد ما شعرى شاب
جيت أخبط على الأحباب
بحماسى ندمت ولومت
نفسى وعاقبتها
وأدبتها علشان يرجعللى احساسى
وأعرف قيمتها وقامتها
وأقيمها وأقومها وأعقل
وأكون راسى
وأدافع عن كيانى وأرضى
وعرضى وأحلامى ودكانى
وأرمى حزنى وأرمى ضعفى
وأرمى ألمى تحت باطى
أو تحت مداسى
وعشان كده خدت قرارى
وحبدأ من تانى مشوارى
ولو فاضل فى عمرى ثوانى
حعمل نفسى ناسى
وأبدأ من اللحظه دى أعود
لبراءة الدهشه
والكلمه الشقيه
إللى مش هشه
والضحكه الصافيه
إللى مش غشاشه
ولا غشه
وأبنى قصور الأمل جوايا
على هوايا
ولو ساكن فى عشة
وأصبح عصفور طليق
ناوي على الطيران والتحليق
وأخطى وأعدى فوق الكل
وأزرع سنابل مليانه
عناقيد فل
وأكتب بصدق القلب
وبحب عن بلدى وولدى
وعمى وخالى وجدى
ما هما دول أهلك وأهلى
وأهل مصر كلهم
أهل وعيلة واحدة
هلال ويا صليب
كلنا فى سلة وحدة
الضحكه والدمعه واحدة
واللقمه والهدمه واحدة
وبنسف التراب مع بعض
وبنشرب من حنفيه واحدة
وكمان كنا فردة واحدة
دى مصر يا عالم
أمنا كلنا وأم الدنيا
حتفضل هى الأولى
والأفضل ولو زارها حد من بره
حنقوله يتفضل
ولو خانها حد من جوه
حنقوله خف تعوم
وروح ألا تتعطل
دى مصر على طول الزمان
حضن أمان معلش
وعن اذنك كمان
أوعوا تقوللى أن زمانى
كان كداب وقاسى
دا انا ياما عشت الزمن
ودفعت التمن غالى
ودلوقتى حتكلم وأتعلم
أن الزمان كان أنيسى وجليسى
لا عمره فى مرة كان كداب
ولا عرفت عنه
أنه فى يوم كان قاسى....