نشرت ياسمين حمدي الفخراني، أول صورة لشقيقها خالد المنتحر بسبب إدمانه لعبة «الحوت الأزرق».
وقالت ياسمين - على صفحتها الشخصية بـ«فيس بوك»: «ماكنتش حابة أنشر له صورة علشان هو ماكنش بيحب ينشر صورة ولا حتى ليه صورة عالفيس بتاعه.. بس علشان في صورة لحد تاني منشورة على أنها لخالد.. واحتياطا علشان مايتنشرش صورة مش كويسة مغلوطة ليه.. فدي صورة خالد أخويا.. ادعو له وادعو لنا ربنا يجمعنا به في أعلى درجات الجنة بإذن الله».
وكشفت ياسمين حمدي الفخراني، عن معلومات جديدة بشأن مخاطر لعبة «الحوت الأزرق» بعد انتحار شقيقها «خالد» بسببها.
وقالت على صفحتها الشخصية بـ«فيس بوك»: يا جماعة اللي الفضول قاتله يبص على اللعبة دي أو شبيهاتها لازم يعمل الحاجات دي:
١- ما يبصش لوحده لازم يكون جنبه مجموعة أكثر من واحد.
٢- ما يدخلش من تليفونه.. من تليفون جديد "بإيميل جديد" مش عليه معلومة واحدة ولا صورة ولا contact ولا أي معلومة عنه أو عن غيره.
٣- يدخل من مكان عام.. كافيه مثلا فيه ناس كتير.. علشان الـip بتاع الواي فاي وكده ما تكونش بتاعه بيتك مش هيأذوا ناس كتير.. لو كانوا يعرفوا يعملوها كانوا عملوها الكفرة دول.
٤- الكاميرتان الأمامية والخلفية يتغطوا علشان ماحدش يشوفكم ولا يشوف المكان من خلالهم.
٥- ما تنفذش أي أمر غلط وانسحب وما تخافش من تهديد أسرتك لأنهم مايعرفوش حاجة أصلا عنهم.
٦- اللي بدأ يلعبها وعاوز ينسحب ما يخافش من تهديد أسرته.. هم لو كانوا يقدروا يؤذوهم كانوا قتلوك وقتلوهم.. كانوا قتلونا بعد ما قتلوا خالد.. لو يقدروا كانوا عملوها دول كفرة عادي.
٧- تضارب المعلومات عن اللعبة وارد جدا بسبب أنها تفاعلية مع أشخاص مش أوتوماتيكية.. يعني يدي ده أمر كذا وآخر أمر تاني وكده حسب اللي بيعرفه عنه، وبسبب كمان وجود كذا لعبة عادي بنفس الاسم.
٨- مافيش أي حاجة تقولك تعالى لوحدك وماتقولش لحد ولا مبروك أنت كسبت جايزة وتعالى قابلنا واستلمها والجنان ده.. الحاجات موجودة فعلا مش بخترع.
٩- وماحدش يقول أنا قوي وأنا جدع وأصل دول عيال بيضربوا مخدرات ولا عبدة شيطان ولا ضايعين.. أخويا كان قوي بجد وعاقل جدا ومتدين وبرضو اتغلب.. في جزء سحر في الموضوع.. الكتابات اللي كانت جنب رسمة الحوت اللي لقيناها في أوراق خالد وريناها لناس قالوا برضه كده وحرقناها.
10- استعيذوا دائما بالله من الشيطان الرجيم وأعوانه طول الوقت.
