كشف الفنان تامر سمير، تفاصيل دخوله الوسط الفني، موضحًا أنه بدأ كعامل نظافة في التلفزيون حتى تمكن من دخول الوسط الفني، بجانب حديثه عن تعاونه مع المخرج الراحل يوسف شاهين.
وقال تامر سمير، في لقائه مع الإعلامية إنجي هشام، في برنامج "المنسي" المذاع عبر شاشة قناة "هي": أنا موظف في التلفزيون، والتلفزيون بالنسبة لي قناة شرعية علشان أرضي غروري، وأنا بدأت في التلفزيون كعامل نظافة علشان أدخل وأشوف لأني ماليش واسطة مع أن والدي الله يرحمه كان ضابط مهم في القوات المسلحة، وفي البيت عندي مكنوش يعرفوا حاجة غير أني رايح وجاي من التلفزيون، وأنا كنت بجيب للناس شاي وقهوة وكنت بطفي نور السقف في البلاتوه كنت ببىقى قاعد ورا الباب على طول.
وتابع تامر سمير: دخلت معهد السينما برضوا ولكن اترفدت، وكنت بروح أسلم على الممثلين ولما كبرت شوية حد قالي تشتغل؟ قولتله أشتغل طبعًا، ومديرتي شافت كارنيه النادي بتاعي وعرفت أن بابا ضابط، وكتبتلي ورقة واتعينت بدل ما كنت عامل نظافة، وبقيت إداري ودلوقتي أنا درجة أولى في التلفزيون.
وعن تعاونه مع الراحل يوسف شاهين، فأوضح تامر سمير: جت أول بداية حقيقية ليا وأول فلوس خدتها كان مع المخرج يوسف شاهين، في فيلم الآخر، وهو إنسان بمعنى الكلمة وعمره ما زعق في البلاتوه، وعلمني أن اللي جوايا اكتبه وأنا كتبت 15 حلقة ومضيتهم مع شركة بسبب يوسف شاهين.
وأضاف: يوسف شاهين كان مدخن شره، تقريبًا كان متجوز السجاير، وكان بيقول أنا بعمل عمليات علشان أدخن، وهو في سرير المستشفى كان بيدخن.
وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساء، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.
