اسماء ابوشال
لقيت واحدة صاحبتى كانت على مشارف محكمة الأسرة بتتصل بيا بعد غياب طويل، ومن طلبها فهمت إنها اتصالحت مع جوزها أبو عين زايغة لما لاقيتها بتسألنى عن محلات بتبيع قمصان حريمى مختلفة، ضحكت ضحكة خبيثة وقفلت عينى نص قفلة كدة وقلتلها يافرج الله خلاص عقلتى وناويتى تدلعى الراجل؟!.
نبرة صوتها اتحولت لتوفيق الدقن، مفهمتش ساعتها إذا كان دا خوفًا من الحسد ولا أنا اللى فهمتها غلط، قالتلى لا مش زى مانتى فاهمة انا عايزة حاجة كدة زومبى ناعم مغرى مش متوقع، زى لبس ممرضة قصير ملطخ بالدماء على شوية اكسسوارات غريبة، جوانتى طويل بظوافر وألبس معاهم بقى عدسات نتاية الهاسكى على باروكة نص أبيض ونص أسود، وبوت طويل على شكل حافر طائر الرُخ.
سارعت فورا بالسؤال: «إيه هتقتليه؟».
اقتله إيه يابنتى أنا عايزة مكان بيبيع لبس «الهالويين».
هالويين !! ياساتر ياساتر
يعنى انتى عايزة ترعبيه ولا تدلعيه؟! قالتلى لا بس من باب التجديد، وعلى العموم لو اتخض يبقى خير وبركة !! أنا هفاجئه السنة دى وأرعبه، واحتفل بيوم الهلع على طريقتى.
مابلاش يابنتى الراجل ممكن يجيلوا سكتة قلبية، لو مش من منظرك يبقى من الحاجات اللى هتشتريها اونلاين دى بتبقى غالية وهيطب ساكت، لو عايزة ترعبيه ماتطلبى منه باسورد موبايله أسهل.
يبدو إن كلامى معجبهاش، شوية ولاقيتها منزلة بوست على جروب «تعالوا نخرب بيت بعض» على فيسبوك بتسأل: «بليز يا بنات اجيب منين لبس ممرضة مرعب للهالويين نايت» وبغض النظر إن فى بنات اقترحت عليها انها تطلق من جوزها على أساس ان دا الحل الرسمى لأى سؤال على أى جروب نسائى، فبقية التعليقات كانت تريقة عرفت منها إن الدنيا لسة بخير.
بعدها بيومين صديقة ثانية لقيتها بتكلمنى الساعة ٧ صباحًا فيديو كول، افتكرت فى مصيبة، بس طلع علشان ابنها يفرجنى على لبس القرصان الأعور وبنتها تورينى لبس أم رجلين مسلوخة اللى بتطير بالمقشة، مع الماكياج المرعب اللى عاملينه قبل مايروحوا حفلة الهالويين بتاعة المدرسة، وبيطلبوا منى الدعاء علشان ربنا يوفقهم ويكسبوا فى مسابقة أفضل شخصية مرعبة.
بفتح فيسبوك لقيت صحابى عاملين جلسات تصوير «الهالويين» ساعتها بس قلت لنفسى قومى يابت عيشى الأجواء وشغلى فيلم «التعويذة» استرى بيه نفسك فى ليالى الخريف المرعبة اشمعنى انتى.
