أعلن الفنان هادي خفاجة، اعتزاله التمثيل نهائيا، مؤكدًا أنه سيتنازل عن عضوية نقابة الممثلين ولن يتراجع عن قراره.
وقرر الممثل الشاب هادي خفاجة الاعتزال بسبب موقف تعرض له مع القائمين على برنامج "وش السعد" الذي يقدمه محمد سعد.
ونشر خفاجة -عبر صفحته بموقع التواصل الاجتماعي «فيس بوك» - صورة لسيناريو إحدى حلقات برنامج «وش السعد» الضي يقدمه محمد سعد، معلقًا عليه: «قررت أنا هادي خفاجة اعتزال التمثيل نهائيًا في مصر، وده بسبب الموقف اللى هاحكيه».
وتابع قائلا «جاتلى مكالمة الساعة ١٢ بليل أن محمد سعد عايزني في تصوير في حلقة من برنامج وش السعد اللي هي كانت النهاردة وأنه عايز يقعد معايا طبعًا لبست وروحت الساعة ١ بليل كان موجود الكاست كله ونجوم الحلقة آيتن عامر ومنة عرفة وعملنا بروفة واتفقت مع مدير الإنتاج والملابس وكل حاجة وأستاذ سامح عبد العزيز المخرج قعدت معاه واتكلمنا عن الشخصية واتفقنا إن التصوير بعدها بيوم وخلصت كانت الساعة ٤ الفجر».
وأضاف: «روحت البيت نمت وصحيت استعديت نفسيًا إني رايح التصوير وحفظت السيناريو كان المعاد الساعة ٥ المغرب لقيت اتصال وأنا في الطريق الساعة ٤ العصر من واحد من مساعدين الإخراج بيقولى أستاذ هادي إحنا أجلنا الاسكتش بتاع حلقة حضرتك وهنكلمك نقولك إمتى التصوير إن شاء الله، افتح من شويه ألاقي الاسكتش بتاعي اتصور بممثل تاني؟ طب ليه اللف والدوران الحمد لله تاريخي مش هيقف على حلقه بس موضوع تقدير أنا حبيت أحكي لأني وسط حاجات كتير حصلتلي مكنتش مستحمل حركة زي دي».
واختتم: «بكرة بإذن الله هاكون في نقابة المهن التمثيلية وهاسلم أستاذ أشرف زكي عضوية النقابة لأنها متلزمنيش في شيء دلوقتي بس بجد كفاية تدمير في المواهب وإحباط في الناس لأن الوسط بجد أصبح عبارة عن عصابات تتحكم فيه، وإن شاء الله هاكمل مستقبلي الفني في دولة تانية بتقدر الإنسانية قبل المواهب والمجالات وده قرار نهائي بجد بيني وبين نفسي مش هرجع فيه».
