آخر ضحكتين بايتين

فتحى أبو المجد 

يا قلب يا أسير
يا بو ضمير بنور
أنا وانت منبتين
فى آخر ضحكتين بايتين
ورا الشبابيك
عيون باكيين
فمين فينا اللى نفسه يضحك..؟
وحُزن النهار مرير 
وهَم الليل قناطير، 
الفرش مرجيحة،
أما الغطا مسامير
والخلق تنام الليل وتخاف
مراكب الفكر الغويط 
تصحا غرقانة من الحلم العبيط 
إن الحياة.. 
أصبحت شخابيط
يا قلب يا خواف 
ما نتاش أمير..
ولا حتى خولى 
فى الجنينة أجير
فخليك حارس 
على الضحكتين غفير،
إنت اللى هارب من عَماك 
فى الليل
يتلقاك نهار ضرير.. 
تقرا مصيرك 
رغم إخلاص الضمير 
إنت الأخير
لكن اعبر وعدة..، 
تعاريج الخط العسير 
قاوم حزنك وسير، 
زى عصفور من زمان 
مَلّ أركان المكان
ولو بجناح واحد كسير
لازم فى السما يطير.