عصام سامى ناجى
نفدت خلاص الطبعة الأولى
والدنيا هى المسئولة
عن أى كسور
والقلب فى وسط الأحزان
مستنى النور
بيخبط على بكرة الجاى
وبيبعت أوجاعه للناى
وينزل براد الشاى
قبل ما بيفور
بيدى «المايك» للراوى
والراوى أساسا مأجور
وامبارح عمال يرازينا
وأشباح اليأس بتتجول
فى كل مدينة
وملامح فرحتنا حزينة
من بعد رحيل العصفور
أسماءنا خلاص مش طيقانا
والواقع بيعيش فى مهانة
والضى فاقد تركيزه
والضلمة بتطلع
فى لسانها وتغيظه
وبتمضى حضور
ونهارنا أكبر أمانيه
يخرج م الحيرة والتيه
وماحدش يحتكره
ويستهزأ بيه
ويعيش مستور
ما يمدش ايده ويتسول
يدخل للبنزينة يفوِّل
ويكون فى الترتيب الأول
لما يروح عند الدكتور
أصله مريض عنده أنيميا
وهو أساسا خريج كيميا
وماتعينشى معيد بالزور
كان بيحب «يوسف إدريس»
أهدى حبيبته أجمل أحاسيس
وتقابلوا فى ميدان رمسيس
راحوا مع بعض المرج
وحصان أحلامهم
من غير سرج
بكره التاية من أيادينا
قاعد يبكى لوحده هناك
واللى فؤادك فاكره ملاك
جاى م الجنة
لو يوم جات له الفرصة يبيعك
هل تتوقع إنه هيرفض؟
أو يستنى
«يوليوس قيصر»
خانه «بروتس»
واحنا برضه ياما اتخنَّى
لكن عادى
واللى اتلسع يوم الشربة
مش مطلوب ينفخ
طبعا فى أى زبادى
غنى دايما وأفضل نادى
حتى لو الناس مش سمعه
على خدودك نزلت دمعة
شوفت الدنيا بالمقلوب
ارتكبنا ياما ذنوب
لكن ربنا هو الغافر
اوعى تسيب الصدق يسافر
علشان حاجة تافهة / عبيطة
ارسم ع السبورة خريطة
درس للتلاميذ جغرافيا
الأوضاع حوالينا ملتهبة
حتى النية كمان
مش صافية
شغل فى الأمانى بتاعتنك
علشان هى كانت طافية
الفرحة ما بقيتشى رزينة
والأوهام بتطارد فينا
والكره مالهوش ترياق
وأنا وأنت لو كنا أعداء
نتصالح أو نعمل حرب
مين فينا هيبدأ بالضرب
ويكون الفايز
رغم إننا فى العقد التالت
أصبحنا عجايز
من كتر ما شوفنا
وبرغم الأزمات
لا أتبدل صوتنا
ولا بيعنا حروفنا
لفينا فى الدنيا وطوفنا
وربك أعلم بظروفنا
أنا وأنت والأحزان
نشبه لبعض قوى
والموت أساسا
مش خلاصة وفهلوى
ولا حتى واقف ع الحياد
واحنا فى وسط التيه
بنصنع من خيالنا بلاد
وندور على سندريلا
ونعيش فى دور السندباد
«ألفونسوا» راجع تانى
علشان يحصار «بن عباد»
«وبن تشفين» مش هيبعت
الفوارس والجياد
وقبل ما تنتهى القصة
نفقد اقلامنا والمداد
اليأس خاطف الأمل
واخده رهينة
والضمير دلوقتى خايف
والكلام فوق الشفايف
بيواسينا
والحنين مالى القلوب
مهما روحنا ومهما جينا
وفلسفتنا العقيمة فى الحياة
توهت طوق النجاة
والطريق لسه فى بدايته
امتى يوصل منتهاه؟
زاد
الحبُ
ناظم حكمت
