حوار| حازم إيهاب يكشف كواليس "يوسف": شخصية معقدة خطفته من الواقع

كشف الفنان حازم إيهاب في حوار خاص مع بوابة أخبار اليوم ، بعد نجاحه الكبير في مسلسل "حكاية هند" ضمن سلسلة أعمال "ماتراه ليس كما يبدو"، كشف لنا عن كواليس تحضيره لشخصية "يوسف"، وتفاعله مع ردود فعل الجمهور، بالإضافة إلى حديثه عن تطلعاته المستقبلية في عالم التمثيل. كانت إجاباته مليئة بالصدق والتفاصيل التي تبرز شخصيته التلقائية والمميزة.

س: لما اتعرض عليك دور "يوسف" في "حكاية هند"، حسيت بإيه؟ وهل شفت إنه دور عادي ولا كان فيه حاجة مختلفة؟
– الحقيقة كنت خايف جدًا. الشخصية مش سهلة خالص، وكان فيها تحدي كبير. أنا كنت مستعد لها، لكن كنت عارف إن في تحدي كبير قدامي. الشخصية نفسها كانت معقدة وفيها الكثير من الأبعاد، وعشان كده كنت متردد في البداية.

س: كنت متوقع رد فعل الجمهور؟ خاصة التفاعل والغضب من تصرفات يوسف؟
– نوعًا ما كنت متوقع بعض التفاعل، لكن الحقيقة التفاعل كان أكبر بكثير مما توقعت. الناس اتحمست وتفاعلت بشكل قوي جداً، وكان فيه غضب من تصرفات "يوسف" وهو ده اللي كان بالنسبة لي مؤشر على نجاح الشخصية. لما الناس تتفاعل مع شخصية كده، يبقى ده نجاح.

س: إيه أصعب لحظة أو مشهد عدّى عليك في التصوير؟ وهل في مشاهد حسيت إنك عايز تعيدها أو تطورها أكتر؟
– أكتر المشاهد الصعبة كانت المشاهد اللي فيها انفعالات ومشاعر قوية، خصوصًا المشاهد اللي كنت فيها لوحدي أو المشاهد اللي فيها قطع، لأن كانت بحاجة لتركز كبير. وكان فيه مشاهد فعلاً حسيت إني عايز أطورها أكثر، كنت أحيانًا بحس إن الشخصيات والمشاعر لازم تكون أكثر تعقيدًا.

س: كتير من الجمهور قالوا إنهم كرهوا "يوسف".. ده أثر فيك شخصيًا؟
– بالعكس، ده كان مؤشر قوي لي على إن الشخصية نجحت في التأثير على الجمهور. لما الناس يشعرون بكراهية تجاه الشخصية، ده يعني إن الشخصية وصلت لهم بشكل عميق. بالعكس، ده خلاني متحمس أكثر.

س: ما حسّتش إنك قسيت على نفسك أو الشخصية خدتك زيادة عن اللزوم؟
– اتخطفت فعلاً مع الشخصية. الشخصية كانت قوية بشكل مش طبيعي، وأحيانًا كنت بحس إني دخلت في تفاصيل مشاعري بشكل أكبر من اللازم، لكن ده كان جزء من التحضير والتفاعل مع الدور.

س: أول رد فعل من زوجتك أو أهلك لما شافوا المسلسل كان إيه؟
– أول ما شافوا المسلسل، قالوا لي: "إزاي عملت كده؟!" (يضحك) كانوا مصدومين من بعض التصرفات والقرارات اللي اتخذتها في الشخصية. بس في النهاية، كانوا فخورين بالنتيجة.

س: احكي لنا عن كواليس التعاون مع المؤلفة والمخرج في "حكاية هند"؟
– كان فيه تعاون كبير جدًا بيني وبين المؤلفة والمخرج. المؤلفة كانت واضحة جدًا في رؤيتها حول الشخصية، والمخرج كان بيخليني أعيش الشخصية وأتفهمها أكثر. التعاون معهما كان مريح جدًا ومثمر.

س: هل كنت عارف تطور الشخصية من البداية، ولا كنت بتتفاجئ زي الجمهور بالأحداث؟
– كان فيه مفاجآت في السيناريو، وأحيانًا كنت بتفاجئ زي الجمهور. ده خلاني أعيش الدور بشكل حقيقي. أنا كنت أقرأ السيناريو وأكتشف تفاصيل جديدة في كل حلقة، وده زود الحماس.

س: بعد "مجحدة"، إيه اللي بتفكر فيه كخطوة جاية؟ ناوي تركز في الأدوار النفسية؟ ولا نوعيات مختلفة؟
– دايمًا بحاول أقدم أدوار متنوعة. لو في دور نفسي قوي، أكيد هقدمه، لكن أنا مش مرتبط بنوع معين من الأدوار. كل دور بيحتاج تحضير خاص وتفكير عميق.

س: بتحب تنوّع في أدوارك؟
– طبعًا، التنوع بالنسبة لي هو الأهم. مش بحب أكرر نفسي في نفس النوع من الأدوار. لازم أقدم حاجات جديدة وجريئة علشان أتحقق في كل مرة.

س: بتحضر لعمل جديد حاليًا؟
– آه، حاليًا في تصوير أكثر من مشروع، لكن الأمور لسه مش نهائية. إن شاء الله قريب هشارك في أعمال جديدة هتكون مفاجأة للجمهور.

س: إيه المبدأ اللي بتحب تشتغل عليه كممثل؟
– الشغف هو الأساس. لما بحس بالشخصية وبكون عايش فيها، ده اللي بيخليني أقدّم أفضل ما عندي. لازم أحس بكل لحظة في الشخصية عشان أقدر أقدمها بشكل صادق.

اقرأ أيضا|أحمد حلمي ينفي رده على تصريحات سلوم حداد بشأن اللغة العربية الفصحى