تحدث الإعلامي محمود سعد عن كواليس مشاركته كضيف شرف في فيلم "درويش" للفنان عمرو يوسف، وذلك عبر صفحته الشخصية موقع تبادل الصور والفيديوهات "إنستجرام".
وشارك محمود سعد مقطع فيديو له قال من خلاله: "كلمني وليد الحلفاوي وقالي على الفيلم وقالي كان بابا هيكلمك وبابا قالي أنا هجيبلك محمود يعمل الدور لأن أنت اللي في السيناريو محمود سعد في البرنامج بتاع "البيت بيتك" سنة 2005، قلت له طيب أنا هتجيبني 2005 إزاي، كان قبل رمضان بحوالي شهرين، عدى الشهر الأولاني محدش كلمني رحت أنا مكلمه قلت له يا وليد أنا مبشتغلش في رمضان قالي لا لا قبل رمضان يا أستاذ، رمضان جيه مفيش حاجة قلت الحمد لله يبقوا لغوا المشهد".
وأضاف: "في نص رمضان لقيت وليد بيكلمني يا أستاذ إحنا جاهزين مصممة الملابس هتكلمك، كلمتني قالتلي إحنا عايزين البدلة اللي طلعت بيها سنة 2005 قلت لها إزاي يعني هجيبها منين دي، قالتلي طيب إحنا عايزين شعرك يبقى زي سنة 2005 قلت لها أجيبها منين، قالتلي هنضطر نبخ في شعرك حاجة قلت لها لا يمكن مستحيل هيصبغوا شعري لا وقفلت السكة معاها وكلمت وليد الحلفاوي قلت له أنتوا وصلتوا لمرحلة مستحيلة إني أنا أصبغ شعري قالي لأ دا في صبغة بيرشوها وبعد ما نخلص تستحمى وخلاص بيروح، مصدقتوش بصراحة واتصلت بالمزين بتاعي سألته قالي أيوة، رحت مدينة الإنتاج ولقيت يسرا ولقيتهم حاطينلي كرفان وكوافير وماكيير دخلوا وحاطين الصورة وقاعدين يعملوا فيا وأنا عمال أضحك أتاريهم بيرجعوني 20 سنة فاتت وصبغوا شعري".
اقرأ أيضا| تشييع جثمان يحيى عزمي بعد صلاة الظهر
وتابع حديثه قائلا: "بعدها عملت المشهد مع يسرا وأنا مش عارف اسم الفيلم بس لقيت عمرو يوسف جيه سلم عليا وأنا بحبه وبقدره وعرفت أن هو بطل الفيلم وأنا رايح ضيف شرف وعملت المشهد وخلاص، بس الحقيقة وليد الحلفاوي كان مش معقول في الالتزام قلت له أني مش بنزل في رمضان خالص وأرجوك اظبط الوقت سألني عايز ترجع الساعة كام قت له 1، الحقيقة أنا رحت الساعة 11 مشيت قبل 1، كان كل حاجة جاهزة".
وأكمل محمود سعد: "يسرا يا عيني أنا صغروني وهي كبروها لأنها طالعة كبيرة في السن، قلت لها إنتي عجزتي وأنا صغروني قالت لي صغرت إيه يا محمود أنت شكلك عادي قلتلها أنا شعري كله أبيض ودا مش شكلي قالتلي لأ أنا شفتك كتير كده".
واختتم حديثه قائلا: "أنا معنديش موهبة التمثيل مبعرفش أقول كلام غيري حتى الكلام اللي هما كتبهولي قلت لوليد لما رحت أنا مش هعرف أقول الكلام دا أنت تعرف فريد شوقي قالي طبعا دا عمنا كلنا، فريد شوقي كان يقرأ الكلام ويقول معناه وحتى قلت "أهل الحب صحيح مساكين" دي من عندي أنا مكنتش موجودة".
انطلاق الأسبوع الثالث لفعاليات "شارع الفن" بمثلث الشريفين وسط القاهرة
سلسلة سيمفونيات عظيمة تتواصل على المسرح الكبير بالأوبرا
إجراءات حاسمة من الثقافة بعد واقعة مثيرة للجدل ببيت ثقافة الخانكة
