نورهان منصور في حوار خاص لبوابة أخبار اليوم .. تفاصيل فنية تكشفها لأول مرة

فتحت الفنانة نورهان منصور قلبها في لقاء خاص مع "بوابة أخبار اليوم"، وتحدثت عن مشاريعها الفنية المقبلة، وأحلامها في التمثيل، ورأيها في ظاهرة دخول البلوجرز والمشاهير غير المتخصصين إلى المجال الفني، كما كشفت عن علاقتها بالفنانة الشابة "نوتا"، وتأثير السوشيال ميديا على الفنانين.

بدأت نورهان منصور رحلتها الفنية بخطى ثابتة، واستطاعت أن تلفت الأنظار من خلال اختيارات فنية مختلفة، وتنوع في الأداء، لتثبت أنها وجه جديد يمتلك الموهبة والطموح، وتسعى دائمًا لتقديم شخصيات تترك أثرًا لدى الجمهور.

في البداية.. هل تحضرين لعمل جديد؟
نورهان منصور:
بالفعل، بشتغل حاليًا على مشروع مسرحي جديد، لكنه ما زال في مراحله الأولى، علشان كده مش هقدر أقول أي تفاصيل دلوقتي.
اللي أقدر أؤكده إنه عمل مختلف تمامًا، ومتحمسة جدًا له، وإن شاء الله يعجب الناس وقت ما يتعرض.

إيه الدور اللي نفسك تعمليه ومجاش لحد دلوقتي؟
نورهان منصور:
نفسي أعمل دور راقصة، بس مش أي دور. نفسي أقدّم شخصية فيها عمق إنساني، ويكون فيها قوة درامية حقيقية.
النوع ده من الشخصيات بيشدني، لأنه بيختبر قدرات الممثل على كل المستويات.

تحبي تنصحي ايه توانا أبنه رانيا منصور؟
نورهان منصور:
أنا بحب توانا جدًا، ودايمًا بقول إن عندها نضج غريب بالنسبة لسنها. أوقات بسمع منها، وبتفاجئني بتفكيرها وردودها.
ودايما بنصحها إنها ما تخليش الأضواء تغريها أو تبعدها عن طموحها وتركيزها، لأن دي أكتر حاجة ممكن تضيّع الموهبة.

 لو اتعرض عليك تقديم سيرة ذاتية، مين تختاري؟
نورهان منصور:
أتمنى جدًا أقدّم سيرة ذاتية عن سعاد حسني أو فاتن حمامة.
الاتنين رموز في تاريخ الفن العربي، وكل واحدة فيهم مدرسة مستقلة في الإحساس، والأداء، واختيار الأدوار.
تقديم واحدة منهم على الشاشة محتاج مسؤولية ضخمة، بس أكيد حلمي أعيش التجربة دي.

 شايفة السوشيال ميديا بتأثر على الفنانين إزاي؟
نورهان منصور:
السوشيال ميديا زيها زي أي حاجة في الدنيا… ليها وجهين: إيجابي وسلبي.
أنا باختار آخد منها الجانب المفيد فقط. هي وسيلة قوية لمساعدة الناس الموهوبة على الانتشار،
وكمان بتقرب الفنان من رأي جمهوره، وده شيء مهم ومفيد لو عرفنا نستغله صح.

كتير من البلوجرز والمؤثرين دخلوا التمثيل.. إيه رأيك في الظاهرة دي؟
نورهان منصور:
بصراحة، أنا مش ضد دخول أي حد المجال، بس بشرط إنه يكون عنده موهبة حقيقية.
الشهرة مش كفاية، لأن التمثيل مش بس كاميرا ولقطة.
هو صدق، وحضور، وحرفية، وموهبة بتتطور كل يوم. الجمهور بقى ذكي وبيفرق كويس.

 كلمة أخيرة لجمهورك؟
نورهان منصور:
بشكر كل الناس اللي بتدعمني وبتتابع شغلي، وإن شاء الله أقدّم حاجة تستحق حبكم.
بحاول دايمًا أختار بعناية، وأطوّر من نفسي، واستنوني قريب في حاجة جديدة ومختلفة.
 

اقرأ أيضا|

نورهان منصور: بشتغل على مشروع مسرحي مختلف ومتحمسة له جدًا| خاص