5 خطوات تشجع أطفالك على التفوق والاستمرار

مع بداية الإجازة الصيفية، بتحاول الأمهات تشغل وقت أولادهم في أنشطة مفيدة، وأهمها الرياضة، سواء سباحة أو جمباز أو حتى الرماية، الرياضة مش بس نشاط جسدي، لكن كمان وسيلة لتقوية الشخصية وتعزيز الثقة بالنفس،لكن أوقات كتير، بعد شوية تدريب، الطفل يزهق أو يطلب يغير اللعبة، وده بيحصل لأسباب مختلفة، علشان كده، قبل ما نفكر نختار رياضة تانية، في شوية خطوات بسيطة ممكن تساعدنا نشجع أولادنا يكملوا ويحبوا الرياضة بدل ما يحسوها عبأ،بحسب ما جاء من الموقع الطبي MD Anderson نشر مجموعة من النصائح اللي بنلخصها ليك هنا بلغة بسيطة وسهلة.

اقرا أيضأ|الأونروا: الأطفال في غزة يموتون أمام أعيننا ولا نملك الوسائل لعلاجهم

1. كن قدوة إيجابية

لو ابنك شاف إنك بتلعب رياضة أو بتتابعها بشغف، هيقلدك تلقائي. وجود قدوة رياضية في حياته، سواء أب، أم، مدرب، أو حتى لاعب مشهور، بيديه حافز وحلم يمشي وراه، الطفل لما يشوف النجاح بعينه، بيبدأ يحط أهداف لنفسه ويفكر هو كمان يحقق حاجة.

2. قلل الشاشات واعمل نظام صحي

الموبايل والتابلت بيخطفوا انتباه الأطفال، وده بيخليهم يزهقوا من التمارين،حدد وقت الشاشة، واهتم إن الطفل ينام كويس ويأكل أكل متوازن فيه خضار، فواكه، وبروتين، الجسم السليم بيساعد على التركيز والتحمل في التمرين.

3. اخرجوا في رحلات فيها حركة

بدل من الرحلات العادية، جربوا تعملوا حاجات فيها نشاط بدني زي ركوب الخيل، مسابقات جري أو عجل، أو يوم سباحة، كده هيربط الطفل بين المتعة والرياضة، وهيحس إنه بيستمتع بوقته مش بس بيتمرن.

4. قدم هدايا رياضية مشجعة

فاجئ طفلك بهدية مرتبطة بالرياضة اللي بيحبها، زي لبس رياضي، كرة جديدة، أو أدوات تدريب، الهدية بتكون دعم نفسي وتحميس للاستمرار، خصوصا لما تكون حاجة هو كان عايزها.

5. شاركه في الأعمال اليومية

خلي الطفل يشاركك في الشغل في البيت زي ترتيب السرير أو تنظيم الحاجات، ده بيساعده يتعوّد على المجهود البدني، ويخلي جسمه مستعد أكتر للرياضة من غير ما يحس بتعب كبير.

تفوق الطفل في الرياضة مش بس بيعتمد على موهبته، لكن كمان على الدعم والتشجيع اللي بياخده في البيت، بلمسات بسيطة زي القدوة، النظام الصحي، والرحلات الممتعة، ممكن تزرع فيه حب الرياضة وتخليه يكمل بشغف وفرح،ابدأ من النهاردة، وكن دايما أول مشجع ليه.