الديوان| حلم عيل مضحك

أنا حلمي ماشي بخطوة متكسرة
يجري بعزة فرس؛ يملاني بالفتونة
وساعات يزُك علشان مانتغرش
مسمار وشابك طرفه في لحافي
لازم أسايسه عشان مايتكرش
علقت حدوة حلمي فوق الرف
واهو جاي يجري صحيح
لكن حافي
بيبصلي يتمنى أجري عليه
وببصله وبهز في كتافي
كان حق حلمي يعيش..
فوق صهوته مخمل
وانا مد ايدي مافيش
بفردها زي جناح
فلقيتها من غير ريش
كان حق حلمي يعيش
فوق صهوته فارس
وانا كل رقعة هزيمة في توبي تعمل توب
انا صاحب الحلم ده
لكنه ماخترنيش
مش هينتصر
معذور
فوق منه بردعة خيش
ولجام بيخنق صهيله
اسمه (اكل العيش)
وخيالي أضيق من خطوته الجامحة
ومنامتي مش لازمه؛ بينام كتير واقف
لا حياتي تنفع له وقلبي هيساعه
هو اللي قلبه يساع الدنيا ويساعني
هو اللي دايما كان مصبرني
مش جاي أبيع لك حلمي أو اغيره
انا جاي أبيعه عشان يغيرني