كشف المخرج والسيناريست عمرو سلامة تفاصيل أول لقاء جمعه بالثلاثي الكوميدي أحمد فهمي وهشام ماجد وشيكو، موضحًا أن بداية التعارف بينهم تعود إلى أيام الدراسة في جامعة القاهرة، وجاءت تصريحاته خلال ظهوره ضيفًا في بودكاست «فايق ورايق»، الذي يقدمه الإعلامي إبراهيم فايق.
وقال عمرو سلامة: "في البداية تعرفت على كريم فهمي، في أولى جامعة، حد عرفني عليه وبقينا أصحاب، كنت في كلية تجارة وهو في طب أسنان ولكن أول سنة بيدرسوها في علوم، كريم قال لي أخويا وأصحابه بيعملوا أفلام، ووراني الحاجات اللي هما بيعملوها، هم مايعرفونيش بس أنا اتفرجت على الأفلام دي، وبتضحك أوي وهم عاملينها بكاميرا صغيرة، قولت له تعالى احنا كمان نعمل فيلم زيهم، وأنا بتعمل جرافيكس فنحط فيها جرافيكس، قال لي يلا، وشوفنا بيعملوا إيه وحاولنا نقلدهم".
وأضاف قائلا: "جيه في يوم من الأيام بليل بيكلمني كريم، بيقول لي إنت فين، قولت له في إيه! قال لي أنا في القسم أخويا اتخانق خناقة كبيرة أوي هو وأصحابه، قولت له اتخانقوا مع مين؟ قال لي مع أصحابي! تعالى لنا عند القسم".
اقرأ أيضا| انطلاقة نارية.. «المشروع X» يقترب من 9 ملايين جنيه في يومين
وأستكمل حديثه قائلا: "رحت عند القسم، وأصحاب كريم دي عيال جامدة، وولاد ناس جامدين أوي، فالخناقة معقدة، طب نتقابل أدام النادي نتصالح، وأنا رايح معه عشان أخوه بيتخانق يعني، اتغدر بينا وخدنا علقة بنتضرب ضرب، من أصحاب كريم، وكريم مش عارف يسيطر ومش عارف يعمل ايه وبيحاول يحوش، وأنا نفسي أثبت نفسي كالعادة ودخلت فدائي، وهما مش عارفين مين الشخص اللي داخل يتضرب معنا دا، وهدومي اتقطعت، والخناقة دي تحت بيت وزير مهم جدا، ودخل علينا أمن مركزي، وأنا معايا عربية، قمت بسرعة لافف على العيال وركبتهم وهربتهم، وهم مايعرفونيش، وهم قعدوا مين دا في شخص أنقذنا مانعرفهوش، جيت بليل قاعدين على القهوة، قالوا مين دا؟ دا اللي انقذنا، ودي كانت بداية العلاقة، وخدت صيت إني واد جدع".
غضب تامر عبد المنعم من شائعة وفاته.. ويتخذ إجراءات قانونية
لقاء مي عز الدين مع إسعاد يونس في صاحبة السعادة يحقق 350 مليون مشاهدة
رامي صبري يعلن موعد طرح ألبومه الجديد «القمر»
