عمرو وهبة يعلق على أذى الحيوانات وتعرضهم للعنف

علق الفنان عمرو وهبة على معاملة الإنسان للحيوانات بطريقة غير آدمية. 

وكتب "وهبة" عبر حسابه الشخصي بموقع التواصل الاجتماعي "فيسبوك": "هي بديهيات بس نقولها، إحنا اتربينا على مثل وكلمة بنرددها كلنا في الجد والهزار بتقول "كلب وراح" على أساس إن الكلب ده أو الحيوان عامة تمام يروح عادي مش مهم.. أي حد ربى حيوان هيفهم ده أكتر بس عامة الكلاب والقطط والحمير والأحصنة كائنات حية".

وتابع: "والكائنات الحية بتحس، وبتحس دي يعني بتفرح وبتخاف وبتتوجع وبتتخض وبتزعل وبتزهق وبتتعصب وبتتوتر".

اقرأ أيضا|عمرو وهبة: «فرحة الجمهور من أعمالي بتسعد قلبي»

وتابع: "وده مش كلام عاطفي، ده كلام علمي، الجهاز العصبي بتاعهم بيشتغل زينا في حاجات كتير، وعندهم مشاعر وإن كانت بشكل مختلف شوية عننا كبشر، وهما مش كائنات دايماً أقوى مننا في التحمل هما زينا بيتعبوا عادي وبيتوترو ساعات من الزحمة والدوشة وبيتعصبو ساعات من هزار الأطفال وغلاستهم العادية وبيزعلوا من سوء التعامل والإهانة".

وأضاف: "بالعكس هما كمان أضعف عشان هما زي الأطفال كده مش بيعرفوا يتكلموا ولا يعبروا فمينفعش نستقوى عليهم ولا نطلع عقدنا عليهم حتى تحت مسمى لازم يتربى لازم يخاف مني لازم أكسره أو هو متعود على كده".