«أنقذه من العمى».. طارق الدسوقي يكشف مواقف سمير غانم الإنسانية

كشف الفنان طارق الدسوقي كواليس علاقته مع الفنان الراحل سمير غانم مشيرا إلى إنقاذ الأخير له وهو على مشارف فقدان بصره ودعمه له.

وأوضح طارق قائلا:« كنت بصور مسلسل في الإمارات وآخر يوم تصوير ليا هناك عيني خدت فيروس نادر جدا لقيتها كلها أحمرت بقت لون الدم وبتجيب صديد وآلام صعبة جدا طول الوقت عايز ضلمة» مضيفا:« في نفس التوقيت دا كنت متعاقد على مسلسل "تزوج وابتسم للحياة" كان بيشاركني فيه أستاذ سمير غانم وكنت هرجع من دبي على بروفات المسلسل».

وتابع خلال حلوله ضيفا على برنامج «الستات ما يعرفوش يكدبوا» كواليس دعم سمير غانم له قائلا:«التصوير كان فاضل عليه 15 يوم ولفيت على أكبر دكاترة عيون محدش عرف يشخص الحالة وقررت اعتذر عن المسلسل وابتديت اتشائم إني ممكن اتعمي وروحت عشان اعتذر وكان أستاذ سمير غانم موجود وحكيت ليه اللي حصل».

إقرأ ايضا: «وشه اتكسر».. أحمد السقا يكشف تفاصيل إصابته الخطيرة بسبب الحصان

وأضاف:«أستاذ سمير طلب مني معتذرش عن المسلسل ودخل عمل تليفون ورجع أخدني عند دكتور من أكبر دكاترة العيون في الشرق الأوسط كان عشان تروحله لازم تحجز قبلها بشهرين» مستكملا:« أستاذ سمير غانم أخد الميعاد وأخدني.. الدكتور كشف عليا وقالي إحنا كنا على أبواب العمى وأدالي مراهم وقطرات وبعد أيام روحت ليه وقالي أن الحمد لله ربنا أنقذني».

وانهى طارق الدسوقي حديثه عن مواقف الراحل سمير غانم الانسانية قائلا:« سمير غانم كان إنسان جميل يكفي إني لما قربت منه عرفت أنه كان بيبقى في مسرحيات خلاص عرضها كذا سنة وبيبقى تعب وعايز يخلص المسرحية لكن يكمل عشان الناس اللي بتشتغل معاه».