3 خطوات احترافية للحصول على كونتور مثالي دون أخطاء

الكونتور بقى من أساسيات المكياج اللي بتعتمد عليها البنات علشان يبرزوا ملامحهم بطريقة جذابة وناعمة، ومن غير ما يبان إن في حاجة مصطنعة، تحديد الأنف وتنسيق شكل الجبهة مش بس بيغير شكل الوش، لكن كمان بيدي توازن وانسجام للمظهر العام، ولأن في ناس كتير بتقع في أخطاء زي المبالغة أو اختيار الدرجة الغلط، هنقدملك 3 خطوات احترافية تضمنلك نتيجة مثالية، زي ما وضحت مجلة Byrdie المتخصصة في الجمال.

اقرأ أيضا| أبرز 6 تريندات مكياج لعام 2025 .. الكونتور يعود إلى الساحة

1. اختاري الكونتور الصح

أول خطوة علشان النتيجة تطلع مظبوطة هي إنك تختاري درجة الكونتور المناسبة للون بشرتك، خدي درجة واحدة بس أغمق من لون بشرتك الطبيعي علشان يفضل الشكل ناعم ومش مبالغ فيه، كمان اختاري تركيبة خفيفة وسهلة الدمج سواء كانت كريمية أو بودرة، ولو عايزة لمسة دافية أكتر، ممكن تضيفي برونزر قريب من نفس درجة الكونتور.

2. تحديد الأنف بدقة

لو هدفك إنك تصغري شكل الأنف أو تبرزيه بشكل متناسق، ارسمي خطين رفيعين بالكونتور على جانبي الأنف، وابدئي من بداية الحاجب لحد طرف الأنف، بعد كده استخدمي فرشاة صغيرة أو بيوتي بلندر مائلة وادمجي الخطوط بلطف لبرا، ولو عايزة الأنف يبان أقصر، حطي نقطة صغيرة من الكونتور على طرفه، ولتحديد دقيق وجذاب، استخدمي هايلايتر مطفي على جسر الأنف وادمجيه كويس بفرشاة رفيعة.

3. تحديد الجبهة والذقن باحتراف

بعد توزيع الفاونديشن، ارسمي الكونتور على حدود الجبهة، وأسفل عظام الخد، وعلى جانبي الذقن، وابدئي تدمجيه بحركات دائرية ناعمة باستخدام إسفنجة مبللة أو فرشاة دمج ناعمة، ولو عايزة توزني الإضاءة في باقي الوش، حطي لمسة هايلايتر غير لامع في نص الجبهة، وتحت العين، وفوق عظمة الخد، الكونتور مش بس بيغيّر شكل الوجه، لكن لما يتعمل صح بيبرز جمالك الطبيعي ويخلي ملامحك متناسقة من غير ما يبان إنك حاطة مكياج تقيل، ومع شوية تدريب واختيار الأدوات الصح، هتقدري تظهري بأحسن شكل من غير أي مجهود.