إلهام شاهين: «سيد الناس» لا يقدم نموذج الحياة الشعبية في مصر | خاص

علقت الفنانة إلهام شاهين على الانتقادات التي تعرض لها مسلسل «سيد الناس» وأنه ينقل حقيقة الحياة الشعبية في مصر، مشيرة إلى أن المسلسل لا يقدم نموذج الحياة الشعبية في مصر.

وأوضحت في تصريح خاص لـ«بوابة أخبار اليوم» قائلة:«أحنا مش عاملين نموذج للحياة الشعبية.. يعني أكيد اعتماد لا تمثل المرأة الشعبية هى متفردة هى حالة موجودة لكن لا تمثل العامة من السيدات» مضيفة:«دي ست مريضة نفسياً.. هل كل السيدات في الطبقة الشعبية مرضى نفسيين؟.. بالتأكيد لأ».

وتابعت قائلة :«الأم سواء شعبية أو غير شعبية بيبقى قلبها على أولادها ولو ابنها ولا بنتها فيهم عيب تداريه مش تفضحه ولا تعايره، لكن اعتماد سيدة مش طبيعية» مستكملة حديثها عن شخصية «اعتماد الهواري» قائلة :«هو ما فيش حد بيتولد جواه كل الكره والعنف ده لكن ظروف حياتها خلتها كده معاملة جوزها ليها إنه كان بيضربها وبيهنها وبيهزقها وبيفرض عليها أشياء خلاها تحس إنها مقهورة».

إقرأ ايضا: إلهام شاهين: محمد سامي مخرج متمكن وكاتب رائع | خاص

وأضافت إلهام شاهين:«دي الحاجات اللي خلتها تبقى عدائية مع المجتمع وأول ما مات جوزها بقت ضد كل الناس وبعدين هى فاهمة إنها بتصرفاتها دي بتقول أنا قوية وإنها بتهتم بمظهرها وبشكلها وبتلبس لبس غالي وذهب كتير بتقول أنا غنية ومهمة على عكس الحقيقة، لأنها لو واحدة مهمة حقيقي وغنية وبتفهم مش هتتمنظر بالغنى».

واختتمت حديثها قائلة :« كل تصرفاتها مش طبيعية وعشان كده هى لا تمثل المرأة الشعبية ما نقدرش نقول إن هى دي المرأة الشعبية.. لا مش هى دي المرأة الشعبية.. دي حالة مش طبيعية، وأكيد في حالات مش طبيعية كتير حوالينا وفي حياتنا».

إقرأ ايضا: إلهام شاهين عن مشهد المشرحة في «سيد الناس»: «اعتماد مابتحبش حد» | خاص

إلهام شاهين عن محمد سامي: مخرج متمكن

وكانت الفنانة إلهام شاهين قد كشفت في تصريح خاص لـ«بوابة أخبار اليوم» عن كواليس تعاملها مع المخرج محمد سامي قائلة :«هو جميل ومخرج متمكن جداً من أدواته وكاتب رائع من قلب الناس قوي وبيعرف يعمل تشويق» مضيفة:«محمد سامي بيعرف يعمل الخلطة الجماهيرية اللي تشد الجمهور وبيعرف يعمل قفلات لكل حلقة مشوقة جدًا بتخلي المشاهد منتظر الحلقة اللي بعدها وبيعرف يستفز المشاهد».