محمد سامي لـ «طارق لطفي»: كلامك مختلق والدور قدمه حسين الإمام

علق المخرج محمد سامي على تصريحات الفنان طارق لطفي بأنه رفض العمل معه بسبب رفضه لتقديم دور شاذ من خلال تصريحات في برنامج «حبر سري».

وعلق سامي على تصريحات طارق عير صفحته الشخصية على فيسبوك قائلا :«ردا علي كلام طارق لطفي المنتشر اليومين دول.. أولاً طارق ممثل محترم وإنسان جميل واشتغل معايا مرتين مرة في مسلسل "مع سبق الإصرار" ومرة تانية في مسلسل "حكاية حياة"».

وتابع قائلا :«وأعتقد الدورين كانوا مهمين ومحترمين جداً وحقق فيهم نجاحا مهما وبعدها عرضت عليه دور في مسلسل "كلام علي ورق" وحصل خلاف إنتاجي علي الأجر تقريباً وعلي مساحة الدور وعمل الدور ساعتها الراحل الجميل الأستاذ حسين الإمام والكلام ده سنة ٢٠١٤ يعني من ١١ سنة».

واستكمل موضحا :«فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد شــاذ وبدأ يتكلم عن المجتمع والناس وخوفه علي الجمهور وكلام غريب جداً بحاله من المبالغة والاسترسال لكسب ود الجمهور واللعب علي الحالة الدينية والمتحفظة عند الجمهور العربي».

إقرأ ايضا: «مش وصي عليها ».. أبرز تصريحات طارق لطفي على خلع زوجته الحجاب

وأضاف محمد سامي :«لكن فاته حاجة مهمة إنه بيتكلم عن دور في عمل مصور وموجود والناس تقدر تتفرج عليه والدور مش دور شـاذ ولا ليه علاقة.. مش فاهم طارق قال كده ليه واخترع الموضوع ده إزاي و كمان عمل حكاية غريبة جداً أنا مش فاهمها وإنه خاف علي عيلته وأسرته وطلعني بروج لشيء غريب جدا».

 وأكد قائلا :«أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد لأن لو طارق عنده عيلة فأنا كذلك ومع إحترامي ليك يا طارق كلامك مختلق وغير صحيح والدور موجود ينفع الناس تشوفه» موضحا تفاصيل الدور قائلا :«كان حسين الإمام رحمة الله عليه طالع بيحب روجينا وهي حبيبة عُمره و أنتيمة ماجد المصري وأحمد زاهر وأشرف زكي وكان جدع مايع عشان أمه رقاصة وصاحب كباريه وده اللي كان عاجبك في الدور وعملت معايا بروڤة أداء عليه وعلي مياعته وكان عاجبك».

واختتم محمد سامي حديثه قائلا :«راجع نفسك يا صديقي قبل إلقاء قنابل تزعل زميلك منك ومعلش إني رديت بالشكل ده ولكن لا بد من الرد للتوثيق كلامك كان لازم يترد عليه وكل سنة وانت طيب وأسرتك الكريمة بخير ولو انت ترفض تقديم دور الشـاذ فأنا قبلك أرفض أخرجه».