«الأصل الطيب» قصيدة للشاعر سامح هريدي

الأصل طيب

والفرع ثابت ع المبادئ

وعشان كده

لساك متبت ع الأصول

حافظ كتاب الالتزام ومذاكره صح

لساك بترفض الانحراف

وبتمشي صح

السكة عوجة

بس انت حالف تعدلها

الرحلة صعبة

بالحب ناوي تكملها

واقف في وش الريح لوحدك

الكل عاندك

لكن مصمم تنتصر

ما هو صعب إنك تنكسر

ف اسمع يا صاحبي

إياك تمل

أو يوم تكل

ولكل شئ في الدنيا حل

بس انت سيبها لربنا

وبلاش تفكر في اللي فات

أو في اللي جاي

واذا كان صحيح الجرح حي

فاهو بكرة هيموت بالسماح

يا أبو قلب أوسع م البراح

بيساع جميع العشمانين

كل اللي دايمًا يقصدك

يرجع ومجبور الحنين

ف ازاي هتقسي

ع اللي زارعه من سنين؟!

مش راح ألوم

لكن هاقول لك كلمتين

اصبر عشان

تاخد ثواب الكاظمين