«وارث ومين يورثك» قصيدة للشاعر السيد الشيتي

وارث ومين يورثك

وهتاخد ايه وياك

سودت ليه صفحتك

سيبت الشيطان أغراك

وطفيت شموع سكتك

ونسيت حدود دنياك

شتت شمل الأُسَر

خاصموا السعاده معاك

وبقيت عديم النظر

شايف الحرير أشواك

عما عنيك الطمع

صلة الرحم نساك

تتغطى ليه بالزمن

من عزتك عَرَّاك

وباعوك ف سوق العَفَن

زرعوا الفساد جواك

ودفعت عمرك تمن

لما الضمير جافاك

مهما الزمن ينصفك

لازم ف يوم ينساك

تلهث وراه يسبقك

وسرابه يجرى وراك

تكدب وبيصدقك

صاحبك ف كل خطاك

نَفَسك وراه انقطع

خليته يتحداك

هتاخد ايه م الزمن

عمرك خُلُص ورماك

هتاخد ايه غير كفن

والدود هيستناك

الظلم كان شرعتك

كان دنيتك وهَناك

الكذب تتنفسه

عن الحقيقه عَماك

يال اشتريت دنيتك

مين ع الرضا عَصّاك؟

هتسيب لجيل غلطتك

قلبك مريض أساك

لوشُفت نور سكتك

كان الضمير صَحّاك