حلمي عبد الباقي يدعم محمد فؤاد بعد واقعة طبيب عين شمس

علق الفنان حلمي عبد الباقي، على الواقعة الأخيرة التي تعرض لها الفنان محمد فؤاد مع طبيب داخل مستشفي عين شمس التخصصي.

وقال عبر صفحته الشخصية بالفيس بوك "قبل أي شئ وقبل أي كلام أنا كمواطن مصري أكن كل التقدير والاحترام لأي إنسان قد كرمه الله وجعله في خدمة ومساعدة البشر، وأولهم الأطباء وكل مسؤل في هذا المجال الإنساني، وهنا أتوقف لحظة وأطرح سؤال ما الذي يجعل محمد فؤاد وهو معروف عنه أنه انسان محترم ومهذب أن يثور هذه الثورة؟، هل عقله قد ذهب علشان يعمل كده أكيد لأ يبقي فيه عامل خارجي كبير جعله يخرج عن شعوره وهو خوفه علي أخوه وعدم مبالاه الطبيب بالحالة والتحدث معه بشكل مستفز وأي حد في مكانه اكيد مش هيقدر يتحمل هذا الاستفزاز" .

وأضاف حلمي عبد الباقي، "قد رأينا جميعا الفيديو اللي فيه لحظة دخول محمد فؤاد وعدم إهتمام الدكتور به، حتي لم ينظر إليه هل لكونه فنان والطبيب عاوز يترسم عليه، ولكن المفروض أن مفيش مجال لكده، وكلنا برده شفنا الدكتور وهو بيخطف التليفون من إيد محمد بشكل هستيري وبعد كل هذه الاستفزازات، وشعور محمد إن أخوه ممكن في أي لحظة تأخير ممكن لا قدر الله ينتهي عمره، المفروض محمد فؤاد يكون عنده ثبات انفعالي علي أساس أنه مش بني آدم عادي ده كلام بالذمه، ده كلام فيه لحظات بتمر علي الإنسان بينسي أنه فنان ولا غيره وهي لحظه خوفه علي حبايبه مفيش ساعتها مسميات".

وأشار حلمي عبد الباقي "هو في الآخر إنسان، وعلي فكرة أنا مش بتكلم علشان محمد فؤاد صديق عزيز، ولكن والله والله بقول كلمه حق وأي حد في مكانه حتي ولو لا يمث لي بصله هقول نفس الكلام، أنا بدعم محمد فؤاد وان شاء الله الموضوع يمر علي خير لأننا كلنا كمصريين، أكيد نحترم أطبائنا ونحترم كل صغير وكبير في تلك المهنة الإنسانية وآسف علي الإطالة".