ماجد أبادير
مش ناوية
مش ناوية الدنيا تجيبها لبر
تقلب فى دقيقة
من برد الدنيا لعز الحر
كيف عيل فقرى.. كان راضع شر
تمسك أحلام الخلق
وهات تكسير
وتمرر ريق الحلق
كمر يصير
ولا ليها أول..
ولا ليها آخر.
ساعة ما تضر
من كتر ما شاف القلب وحس
من كتر ما دمع العين.. حافظ خطاويها
قربت ادارى ف أيها ركن
وانا ساقف روحى
بجوز درعاتى
لغاية ما تمر
وماتشوفنيش!
التليفون
كانت هنا هو
زى ما تكون من نص دقيقة
ومصالحانى ومهاودانى
وزى ما تكون ف ودانى لسة رنة تليفونها: (آلووو)
مالية الدنيا شقاوة وضو
يخلف كل الكون مواعيده
وهى اظبط على مواعيدها
أيام لاعياد
صباح الفل حبيبى
صباح الورد
أيوه حبيبتى
صاحى؟
يوووه!
مين لوكان العيد الصبح ينام؟
وان غفلت عنيه ثوانى
بالقاه ف الأحلام
آلو.. آيوه ادينى
أيوه حبيتى..
كنتى بتبقى خلاص قربتى
جنب اليافطة الواخدة يمين الشارع
جنب المصنع
مصنع اسمه خزف على صينى
ولسانى مستنى التليفون
آلوووو
ايوه ادينى.
متأخر خطوة
متأخر خطوة
عن كل أبطال الحدوتة
وقلبك زى ما هوا
محلك سر
لساك متعشق ف التفاصيل
مفكوك على ميت حتة
عمرى ماشفتك متشبك
لازم ناقصاك حتة
واهى عدت قدامك
وانت بتفرك لسة عينيك
قلعت كل زوايا الرؤيا وسابتك لايص
حتى البوسة ف آخر لقطة.. مشجعتكش
لجل تقوم الصبح..
وتاخد.. كل سنانك بالفرشة
وتضيع ريحة التبغ
اهى الحدوتة خلصت خالص..
واتسكن فيها مكانك.. دوبلير
خليك ف الأوضة الضلمة
اللى ما بتخلكش تشوف
حتى الدخان
الطالع حلقات وخيطان
من بق سيجارتك.
زاد
الحبُ
ناظم حكمت
