شريف إكرامي: لهذه الأسباب إيريكسن عاش وأحمد رفعت مات

كشف شريف إكرامي حارس مرمى فريق بيراميدز الفارق في التعامل مع حالة كريستيان إريكسن، لاعب الدنمارك وبين أحمد رفعت لاعب فريق مودرن سبورت الذي وافته المنية فجر أمس السبت عن عمر يناهز الـ31 عامًا، إثر تدهور حالته الصحية.

وقال إكرامي عبر صفحته الرسمية على التواصل الاجتماعي تويتر: «أحمد رفعت مات بس كريستيان اريكسن عاش..
مات مع ان اللي عالجوه طلعوا كل يوم في البرامج يتكلموا ويطمنو الناس عليه ،و يأكدوا لنا ان محدش قصر..
رفعت مات مع إن الوزير راح بنفسه واطمن عليه واتصور معاه كمان عشان يطمنا أكتر..
مات بعد تأكيد مسئولي ناديه أنه في طريقة للعودة للملاعب وأنهم عملوا معاه الواجب و زيادة».

أضاف: «طبعاً لكل اجل كتاب اللهم لا اعتراض 
بس بردو لكل أجل سبب..اريكسين عاش عشان اتلحق من اول ثانية قلبه فيها وقف..مش بعد نص ساعة.. اريكسن عاش عشان فيه قدسية لحياة الانسان و صحته..مش بنتاجر بيها.. عاش عشان في ناس بتشتغل بجد..ناس مسئولة عندها ضمير واحترام لنفسها ولمناصبها،مش ناس كل همها تبان كده.. اريكسن عاش لأن في ناس اشتغلت علي كل حاجه عشان تنقذ حياة بني ادم..مش اشتغلت بس عشان تخلي مسئوليتها.. اريكسن عاش عشان محدش قهره نفسياً ولا ذله و لا اتحكم فيه و لا فمستقبله».

تابع: «روح يا رفعت للي ارحم من أي حد..
روح عشان حق اللي بيموت هنا يابني كام صورة علي شوية تغريدات،و دمعتين في البرامج و اخرهم يومين تلاته..وبس
ارتاح يابني و سيبنا هنا مع الآفاقين والمتاجرين معدومي الاحترام و الضمير و الانسانية.. ارتاح يا رفعت لعل و عسى موتك يكون سبب في صحيان ضمائر و ذمم ماتت من زمن..رحمك الله يا أحمد».

وأعلن نادي مودرن سبورت عن وفاة أحمد رفعت لاعب الفريق، أمس السبت إثر تدهور حالته الصحية.

وكتب نادي مودرن سبوت عبر حساباته على موقع التواصل الاجتماعي: ﴿يَا أَيَّتُهَا النَّفْسُ الْمُطْمَئِنَّةُ ارْجِعِي إِلَى رَبِّكِ رَاضِيَةً مَرْضِيَّةً فَادْخُلِي فِي عِبَادِي وَادْخُلِي جَنَّتِي﴾

ببالغ الصبر والحزن وبمزيد من الإيمان بقضاء الله وقدره، يعلن نادي مودرن سبورت عن وفاة أحمد رفعت لاعب الفريق الأول ومنتخب مصر أثر تدهور حاد في حالته الصحية، تم نقله على أثره إلي المستشفى ليتوفاه الله، بعد رحلة شاقة من الصراع بعد الأزمة الصحية التى حدثت له يوم 11 مارس 2024.

بقلوب يعتصرها الحزن لا نملك إلا الرضا بأقدار الله يتقدم النادي بخالص التعازي لأسرة اللاعب وجماهير الكرة المصرية داعين المولى عز وجل أن يتغمده بواسع رحمته ويسكنه فسيح جناته ويلهمنا جميعاً الصبر والسلون.