«صبر الرجال» قصيدة للشاعر عبد التواب الرفاعي
شقشقة نور السما
والضلة وقت الحرّ
تشبه لعيل حُرّ
ما بيتكسر عوده
واقف بقوة أسد
ما خلفشي لوعوه
الخير كسيل من مطر
في الزرعة مردوده
وابن الحلال منتظر
من ربنا وعوده
والصبر ع الأندال
بيعلي مقاديرنا
حسنات كتير كالجبل
ولا عمرنا خسرنا
مش ضعف ولا هزيان
لكننا قِدرنا
يا أيها المغرور
اركن لي هنا على جنب
أصل ابتلاء ربنا
مش شرط جاي من ذنب
صبر الرجال على البلى
بيقوي عضل القلب
وأنا قلبي جامد أوي
زي الرجال في الحرب
صبر الرجال في المحن
أشبه بنار في القش
ومهما زاد الرماد
بمقشة راح يتقش
من يومي رجل أوي
ولا يوم ببات مخنوق
ولا بكتير المال
أو كنت يوم مزنوق
زي كتير من البشر
بضحكلها فترُوق
دنيانا تشبه سوق
وكله بيلوِّش
هتسيبها قولي لمين
يا اللي انت بتحوِّش
كوِّش كمان كوِّش
القبر بلا مناديب
ومافيش هناك واسطة
فبلاش يا عم تخيب
وقضيها مباسطة
افرح وعيشها بحب
تلقى الحياة باسطة
اقرأ أيضا | «ست الدار» قصيدة للشاعر عبد التواب الرفاعي
