حلت النائبة صبورة السيد، والدة المخرج محمد سامي، ضيفة في برنامج «آخر اليوم»؛ الذي تقدمه الإعلامية سارة نخلة على شاشة قناة «هي»، وروت الكثير من كواليس حياتها المهنية المليئة بالإنجازات والتحديات.
علقت الفنانة مي عمر على علاقتها بحماتها خلال مداخلة هاتفية قائلة: "علاقتي بحماتي إنها أمي التانية وملهاش علاقة بمحمد لأني باخد رأيها في حاجات كتير وهي بتهتم جدا بأعمالي وبتتفرج قبل الناس هي بتعرف تحتوينا كلنا ولما بيبقى في مشكلة بروحلها هي بتقف معايا أنا".
وأضافت: "في صفات مشتركة بيني وبينها زي إنك تكوني كتومة متحكيش كل حاجة لأي حد لما بيبقى في مشاكل بحكي للناس القريبة مني أوي الناس اللي بتحبني بجد وبتخاف على مصلحتي بجد مش الناس اللي ليها مصالح أخرى، وإنك تفكري كويس أوي قبل ما تاخدي قرارات".
أما عن تعليقات الجمهور على علاقتها بالمخرج محمد سامي قالت: "مبخافش من الحسد ومبركزش خالص مع الحاجات دي، وبشوف ناس كتير مبسوطة وبتقول كلام كويس وايجابي وبيسألوا طب ازاي دا وبيشوفونا بصورة حلوة وعايزين يعملوها".
كما كشفت النائبة صبورة السيد عن أهم صفات الفنانة مي عمر كزوجة وأم قائلة: "هي بنتي ومرات الغالي وأم الغاليين هي عندها مؤهلات كتير أوي إنها تبقى أم أحلى أحفاد وأحلى حفيدات هي غالية وحنونة وتستاهل اللي هي فيه وأكتر".
وأضافت: "بقول الله خير حافظا وبنقرأ قرآن بس ليه الناس مبتحبش تشوف اتنين بيحبوا بعض، واحنا ارتبطنا بفنانين زمان السيدة فاتن حمامة وشادية ومريم فخر الدين وكنا بنحب نشوف الرومانسيات والحب بتاعهم لكن دلوقتي بنستغرب إن احنا نشوف زوجين حلوين ودول نموذج وياريت كل راجل يبقى بيهتم بمراته وهي تهتم بجوزها ويبقوا قدوة كويسة لعمار البيوت".
برنامج «آخر اليوم»
برنامج حواري متنوع تقدمه الإعلامية سارة نخلة على شاشة قناة «هي»؛ يتضمن العديد من الفقرات الاجتماعية والفنية والاقتصادية، ويستضيف عددا من النماذج الملهمة والشخصيات المؤثرة في جميع المجالات، يذاع كل يوم سبت وحد من كل أسبوع الساعة السابعة مساء.
