أشاد الفنان تامر حبيب بالعمل الدرامي مسلسل"كامل العدد+1" عبر حسابه الرسمي على مواقع التواصل الإجتماعي "إنستجرام" .
وعلق كاتبا: "شهادتي مجروحة علشان كاتبتي هذا المسلسل هما بناتي و صاحباتي وزميلاتي وفلذات أكبادي، رنا أبو الريش ويسر طاهر، أنا شديد الفخر وشديد السعادة.. انتوا اختارتم من الجزء الأول ومع سبق الإصرار انكم تعملوا الموضوع ده، واختياركم كان ينم علي منتهي الذكاء علشان اختارتم موضوع شبهكم، شخصيات من عوالمكم، وعلاقات عارفينها كويس وقادرين تتكلموا عنها بتفاصيلها ومواقفها وصراعاتها، وعملتوا كده وكتبتوا مسلسل ممتع وشيق وحقيقي وطيب، وطيب دي نحط تحتها ميت سطر.. طيب وسط غابة من مسلسلات الدم و المغامرات والعلاقات المشوهة بين الحبايب وبين الأخوات والأهل وبين الصحاب والقرب والغرب".
وتابع: "مسلسل طيب في دنيا كلنا واخدين علي خاطرنا منها ومش مآمنينلها، ونجحتوا في ده جداً السنة اللي فاتت، ويمكن ماكنتوش ناويين تعملوا جزء تاني، أو يمكن كنتوا ناويين، بصراحة مش عارف ومش هأفتي.. أضف إلى ذلك أن الغالبية العظمي من الأعمال اللي بيتعمل منها جزء تاني، بيكون جزئها الأول أقوى وأحلى، وهنا حدث الاستثناء.. ذكائكم وصدقكم وموهبتكم في اللي انتوا كاتبينه السنة دي ربطتنا كمشاهدين وحببتنا في الشبكة الطيبة المبهجة الممتعة دي أكثر وأكثر.. أنا شخصيًا ومن أول حلقة ماتش الكورة لقيت روحي عايز الحق اخطفني كرسي وسط العيلة الحلوة دي و اتفرج معاهم علي الماتش".
وواصل حبيب: "دموعي فاجئتني وفرحت كأني بجد واحد منهم.. كل واحد في الناس دول بقي يخصني، وكل شاب وشابة وطفل وطفلة بقوا ولادي.. بقيت عايز أساعد في حل مشاكلهم، وخايف علي الولاد زي ليلي وأحمد بالظبط وشايل همهم.. عيلة كامل العدد بقت عيلتي بجد علشان العيلة دي هي فعلاً هي عائلاتنا كلنا أيام ما معني العيلة كان موجود ومهم.. ويا رب كل اللي اتفرج يبقي افتكر وفهم وقدر المعني ده. فرحت قوي وأنا بأتلخبط وأنا بأتفرج ومش فاكر مين ولاد مين ولا مين اخوات مين.. يا رنا ويا يسر و يا خالد يا خلفاوي يا إنسان.. ماظنش إن أي حد فينا ماكانش جعان ونس ودفا وطيبة لقيناهم عنكم، وعمرنا ما هانشبع منهم ابداً".
إقرأ أيضا| أحداث سعيدة في الحلقة الأخيرة من مسلسل «كامل العدد +1»
وتابع: "واكيد كل فرد من أفراد العيلة دي هما وقرايبهم وصحابهم وحبايبهم وحبايب صحابهم ليه دور عظيم مايقلش عن دور الثاني في إحساسنا بالونس ده.. أنا لسة أنا لسة ماشوفتش آخر حلقة، قاصد أجل آخر قعدة معاكم اللي بعدها علطول هأفضل مستنيكم لغاية ما ترجعولي السيزون الجاي".
مسلسل كامل العدد
تدور أحداث مسلسل كامل العدد + 1 في إطار اجتماعى لايت، حيث يواجه الزوجان ليلى تيمور (دينا الشربيني) وأحمد مختار (شريف سلامة) مشاكل جديدة خاصة بابنائهما وحياتهما الزوجية، استكمالاً لما دار في أحداث الجزء الأول الذى تم عرضه في شهر رمضان الماضى، تبدأ أحداث العمل بولادة ليلى طفلا جديدا يطلقون عليه اسم عمر.
