حلت الفنانة منى زكي عبر «Big Time Podcast» مع الاعلامي عمرو أديب، وكشفت عن العديد من المحطات الفنية والشخصية خلال البودكاست.
تحدثت منى زكي عن حبها للفنان أحمد حلمي، مؤكدة أنه يقدم لها الدعم دائما في أصعب الأوقات، وأنه أفضل رجل في العالم بعد والدها، قائلة: "أحمد حلمي أحسن راجل في العالم بعد بابا، وكل ما نشوف بعض ببوسه، حتى لو خارجين بنبوس بعض ولما بنرجع، علشان نعلم أولادنا يعملوا كده".
وأكدت منى زكي أن أحمد حلمي أكبر داعم لها، قائلة: لما بتشتم من الجمهور بيقولي إنتي تعرفيهم مين هما اللي بيغلطوا، أقوله الناس، يقولي لا هما يعرفوكي، ولا أنتي تعرفيهم، ليه ده يأثر فيكي.
وأضافت منى زكي: مهما كان الموقف كبير بيشجعني لأنه عارف نيتي إيه، وعارف إيه الفن، لأن في ناس بتفكره إعلان.
وكشفت منى زكي عن أبرز صفات نجليها، ورأيها في تجربة الإنجاب بعد بلوغ سن الأربعين، مؤكدة أنها تجربة صعبة، موضحة: "التجربة صعبة أوي ومخيفة أكثر، لأنك مش عارف هتعيش لهم أد إيه، وهتوصل معاهم لأي مرحلة، فتبقى نفسك تديهم كل حاجة".
وأضافت: "إنك تحاول تبسطهم ده مجهود رهيب في الأربعينيات ومش سهل، مافيش نفس الطاقة لكن في حنية وفهم أكثر، كانت الأول زعزوعة لوحدها يا حرام، وبعدها جيبت الإثنين ورا بعض".
وردا على سؤال ما هي أبرز صفات نجليها، قالت منى زكي: "عندنا واحد هو عادل ابن الناس الكويسين في فيلم سهر الليالي، سليم اللي عمره 9 سنين، دكتور في نفسه ومهذب أوي وحساس وزوق جدا، والثاني بلطجي خالص ومخوف البيت كله، وكفاية نظرته وإنك مش متوقع أبدا رد فعله".
وكشفت منى زكي عن لجوئها للمتخصصين لمساعدتها في التعامل مع ابنها الثاني الذي أتم سبع سنوات حديثا قائلة: "كان عندنا صعوبة في التعامل وأنا شخصيا كان عندي صعوبة، روحت لحد يقدر يساعدني والموضوع اختلف".
أوضحت منى زكي أبرز الخبرات التي اكتسبتها للتعامل مع ابنها قائلة: "علموني إني لازم الأول أسمعه، وبعدها أفهمه ليه مش هنعمل اللي هو حاسس به، لكن بهدلني سنتين لغاية ما عرفت أتعامل معاه".
تفاصيل برنامج «Big Time Podcast»
واستضاف برنامج «Big Time Podcast» في أولى حلقاته الفنانة أصالة والفنانة شيرين عبدالوهاب والتي أثارت الجدل بالعديد من التصاريح، كما كشفا عن العديد من الأسرار والخبايا.
