اللي فاكره من ابتدائي
صوت شاهندة
أبلة عايدة
شكل العصايا بتاعة الأستاذ أحمد رشاد
الحرب على الدكة الأولي
وانا قاعد باتفرج دايمًا
وماجاش في خيالي اني اتدخل
أو حتى أشارك يوم فيها ..
الشلة اللي ف قلب الملعب
اللي بتتحكم في الأحداث
مريلتي العِشرة الصابرة معايا لرابع عام
وحروف مش فاهم معانيها
طب أحمد لطفي السيد مين؟
وازاي اسمهعلى مدرستي؟
ودروس كات ساكنة ف كراستي
أنا باضحك دلوقتي عليها
كل اللي أنا فاكره اننا كنا
جيل طيب جدَّا والله
كان جد الجد ومش لاهي
وماكانش ف أيامنا تلاهي
عن كل جميل نبِّت فينا
تلاقينا مع أبلة فضيلة
أو ميكي وبطوط أو بقلظ
اليوم المفتوح ع الأولى
أو تاكسي السهرة ونبقى تمام
من نادي السينما
على بكار
الشيخ الشعراوي ودرسه
لأ والدكتور مصطفى محمود
عربية الكشري مع الحمص
كيس العسلية ابو نص جنيه
الرضا بالحال
حتى ان كان صعب
المعنى الأصلي لكلمة حب
الجو العام كان طارح خير
كان ود ورحمة وليها كبير
كان فيه تقدير
لكبير البيت
وكبير الشارع
وكبير الحي وللأستاذ اللي بعِلمُه
نوَّر ليالينا وأيامنا
حلو زمنا
ولأحلى صبايا عيونهم روح
مش ممكن تلمحهم مرة
بيبصوا ع اللي ماهوش مسموح
البيت مفتوح
يستقبل رجعة شقيان
علشان يرتاح
الوقت براح
بيكفي لقعدة طبلية
حوالين الشال ويّا الطارحة
وحكاوي تغذي العقل عادات
وتروح ف الدم قوام سارحة
البركة بتنده للفرحة
وتعمّر أركان الدار
الناس م الآخر كات صافية
ونفوسها عمار
الجار كان يشبه للجار
ف تقول اخوات
ونتوه مع غنوة بصوت الست
وندوب مع لحن أساسُه بليغ
فيروز وحليم والسنباطي
وطوبار لو قال حتة بياتي
والشيخ رفعت والمنشاوي
وچاهين لو كان مع مكاوي
بيخلوا الليلة كبيرة بجد
فتلاقي الجمعة ويوم الحد
قاعدين مع بعض على الدكة
نفس السكة
هتلاقي القمح المبدور
م النجمة
واقف في طابور
مستني حضور الزغاليل
هتلاقي النخل اللي لا يمكن
أبدًا هيميل
واقف زنهار
يحرس في نهار المعروف
هتلاقي كسوف
على وش الشجرة اللي لايمكن
تلاقيه مكشوف أبدًا للغير
هتلاقي الطير
واقف بيسبح وبيضحك
فرحان بيغني مع الساقية
اللي بصوتها تسمع مواويل
هتلاقي النيل
واقف وبهيبة
بيوزع روحه على المخاليق
لو كات بتضيق
ف ب لمة أحباب راح تُفرج
مليون مخرج
لو عند فلان أصلًا أزمة
هتلاقي الكل يكون حزمة
وقوام تتحل
هتلاقي الحل لأي سؤال
راح يشغل بال المحتاج
النور أمواج
بيشيل العتمة ويمحيها
ويسيب ف خيالي أجمل ذكرى
مش ممكن هتتوه معانيها
