ومين حبك ومين اشتاق
وماسك فيك ولو بخناق
عليك يجري لو الحال ضاق
عشان كان شايفك الترياق
وعشقك عشق ماعشقهوش
وغيرك عينه ماتشوفهوش
يحوش عنك وعنه تحوش
ودونك دنيا تبقى فاشوش
ومين كان حلو وسط مرار
وكان الحامي من الأخطار
لا عمره يخاف ولا يحتار
عشانك دمعه كان أمطار
ومين جاني ومجني عليه
وسيبته ولاّ سابك ليه
وقال إنك ما حاسس بيه
ولا مقدر مكانتك فيه
ومين ظلمك ومين باعك
وزرع الشوك بأوجاعك
يزيد الجرح في متاعك
وعمره ماكان من اتباعك
وليه يقفل في وشك باب
ويبعد عنك الأحباب
يقرب منك الأغراب
يسيبك وسط نار وعذاب
