أنا واقف أجيب حزمة جرجير
ف باقول لخالتي أم محمد
ان شالله يارب تكوني بخير
ف قالت لي في ايه
قلتها عشان يوم المرأة
العالم كله اهو بيعيّد دلوقتي عليها
قالت وانا مالي
دول عالم فاضية
وانا يا ابني ورايا هم كبير
أنا يا ابني العيد بالنسبة لي
لو يعني الناس تنظر ليَّ بحبة تقدير
لو يعني الشارع دلوقتي
ياخد مني شوية جرجير
لما المح ضحكة أولادي
أو لما بنتعشى فى مرة
أو لما البلدية تعدّي
من غير ما تدوس على أحلامنا
وتزود في مرار أيامنا
خد طلباتك يا ابني وروَّح
وبلاش تتريق على حالنا
قلت لها ازاي
ولا عاش ولا كان اللي يفكر
انه ما يجبرش بخاطرك يوم
انه يخليكِ تشيلي هموم
انه يكون راضي بأحزانك
انا لو بإيديَّ
اختار دلوقتي أبقى مكانك
ده انتِ بتاكليها بعزة نفس
واختارتِ تكون اللقمة حلال
ده انتِ مداسك ع الراس يتشال
صبرك يتدرس للأجيال
حملك أتقل من أي جبال
ولا يوم كَلِّتِ ولا تعبتِ
ولا سلمتِ
وعافرتِ لحد ما كبّرتِ
أولاد بقوا قدوة لأصحابهم
وانا برضه فخور اني صاحبهم
وباحبك زي أمي كمان
أصل انتِ وهي أكيد واحد
رحلتكم في الدنيا كفاح
والشقا عنوانكم وراحتكم
تيسيبوها تملي لأحبابكم
والله يا خالتي ما كنت أقصد
غير أني اقول لك من قلبي
كتر خيرك
أصل أنتِ المرأة اللي حقيقي
علشانها العالم يعمل لك
العيد مش يوم واحد لأَّ
عيدك دايما طول الأيام
