«مأذون» قصيدة للشاعر غريب الشعرواي
يا عم يا مأذون
تعالى مد إيديك
خلى الطبيخ موزون
بالفرخه قبل الديك
واكتب كتاب فرختى
على ديك من الرومى
و المهر من صرختى
رجّْع على هدومى
رجّْع رصيد الحلل
لبنك دولاراتى
فك الجنيه بالقلل
واتغندر الحاتى
يا حاتى يوم دخلتك
على قرشنا الدافى
رقصت لحوم فرختك
على وصل صرافى
وصل الأمانه الشجى
بِلّْغْ على ديوكى
والكفته م الطرشجى
ع السفره فى بنوكى
وبنوكى من حسرتى
بتساعد المأذون
يكسر رقاب قلتى
بالألف و المليون
مليار جنيه للعسل
مليون جنيه للبيه
ديكنا الحليوه وصل
للحله دون رجليه
يا محللين المرق
طعم المرق مغشوش
مرحوم جنيهنا الورق
والسنت بات منعوش
يا قرش صاغ عُملتى
مالك ومال جهلى
بتزيد دموع أزمتى
بديون على أهلى
