أعرب الفنان ونقيب المهن الموسيقية مصطفى كامل، عن قرار عودته للنقابة، بعد تلميحه بالاستقالة عن منصبه منذ فترة، وأكد أنه عمل على الإصلاح من النقابة على جميع الأصعدة.
وقال مصطفى كامل خلال تصريحاته مع الإعلامي خيري رمضان، ببرنامج مع خيري: العودة للنقابة لسة من بكرة إن شاء الله أول يوم، وهي مكنتش مبادرة ولا حاجة قد ما كان قرار بإني أفوض ناس مكاني جايز تقدر تقوم بدور أحسن مني.
وأوضح مصطفى كامل: «كلام زوجة حلمي بكر حاجة من الحاجات اللي استغربتها مش فاهم ليه قالت كدة، لكن للأمانة ساعات بتكون اشتغلت بكامل طاقتك وعاملت ربنا، زي إني دخلت لقيت النقابة بيت لا يليق بإن يعيش فيه حشرات مش بني أدمين، وفي خلال شهر بقى الناس بتيجي تتصور سيلفي جوة النقابة وفرحانين إنهم قاعدين في حاجة تليق بيهم، وكمان عملت على محاربة الفساد».
وأضاف مصطفى كامل: قولت هدي فرصة شهر لـ اللي بيشتغل كويس تمام واللي لا يطلع برا، وللأسف كنا بنلاقي صفحات وهمية على السوشيال ميديا بيهاجموني وبيهاجموا الزملاء في المجلس ويقولوا علينا مرتشين، مرتشين وحرامية إزاي وإحنا وبتقارير محاسبين الإدارة، مستلم السنة اللي فاتت نقابة فيها أول عن آخر 69 مليون جنيه في شهر 11 سنة 2022، وأول امبارح فيها 81 مليون جنيه.
وعن معاشات نقابة المهن الموسيقية، أكد مصطفى كامل أنه عمل على زيادتها بمقدار خمسين بالمائة، وقال: أنا مستلم معاش النقابة 1053 جنيه، والنهاردة بقى ما يعادل زيادة 50 في المية وبقى 1556، ولما بعدي ألاقي حبايبي مبسوطين عشان زودت المعاش بقيمة النص ويقولي أنا سعيد بقوله أنا مش سعيد، مش ده لسة اللي بحلم بيه في النقابة، ورحمة أبويا أنا بشتغل لله مش عشان أكسب ود حد، ودائما أقول ستظل أولويات الناس عندي عن المعاشات وكبار السن والمرضى، ميهمنيش الجمعية العمومية، أنا براهن على اليتامى.
