ولاقيتهُ عَدل الكرافته
وقال بكل غرور
الشعر ده ابن ذوات
متربي جوة قصور
لا عمره خش حارات
ولا حتى بات مكسور
ساعتها كنت هارد
لكن منعني الأدب
أصل اللي قال معذور
معرفش معنى الأدب
ده الشعر مش سهوكة
ولا عين ورمش وضي
الشعر في المعركة
زي الرصاص الحي
الشعر صوت الناس
لو يعني قالت آه
بيترجم الإحساس
تسمع تقول الله ..
ده الشِعر حلقة ذِكر
والشُعرا دول دراويش
تدخل تدوب م الفكر
تموت كتير ف تعيش
الشعر في الطوابير
واقف يجيب العيش
الشعر في الزنازين
وف قلب عنبر جيش
الشعر لمبة جاز
بتنور الحارة
ساتر منيع وفولاذ
وبيحمي م الغارة
الشعر زاد للفُقرا
وميّه للعطشان
لو يوم بقلبك تقرا
هتحس بالإنسان
الشعر ابن الحالة
والحالة لو عامة
الشعر يبقى الزعيم
ويوحد الأُمة
