عاوزني أموت
وأحلامي
تموت ويايا من بدري
عايز ليلي مع نهاري
بإيدي يفوت
وبكره في كبت ويا سكوت
وروح مكسورة
زي إزازة حطمها
أمل خايب
فقعدت زيي فاقده النطق
عايزني أعيش في قلب تابوت
ما ليا وجود
وكل أماني أحلم بيها
مأعيشهاش
وما تقولشي
بإن احنا رابطنا الدم
ولا عشرة
ولا ضحكة
كانت عايشه جوه القلب
يمكن حسو جوه مني بالوحده!
وخلوها لي نقطة
ضعف تكسرني
وتبقي الجسر
يعدو بيه على جراحي
بلا رحمة
ولا رأفه
لقلب بينزف الآهه
ما بين ضلعي
ودولا مين
يا خلق بحق دلوني
بشر زيينا ولاوحوش ؟
متعرفش
وانا معرفش ايه ذنبي
وذنب الطيبة من قلبي
وحبي لناس ما بتقدر ..
ضميرهم مات
ضلال عايشينه ليل ونهار
وكل ذنبي كلمة حق
لما بقولها
بتتهد جبال وبيوت
لكن عمري في يوم ما خسرت
ولو هاخسر
هتبقى الناس كأن مفيش
لكن يبقى الكريم موجود
ماليني يا رب بالقوة
لكنك لو عاوزني أموت
كفايه جوه مني هعيش
«جوه مني هعيش» قصيدة للشاعرة ياسمين القاضي
