قُلْت السلام باليمين
جِيتوا ف حواري شمالي
وانا اللي زارع أمين
وادّيتكو من نخْل عالي
وفْ عزّ ضرْب السنين
باحلم بواقع خيالي!
الحقّ لهْ ألْف عين
بسّ اتعميتم قبالي
تعْلبكوا باعْكوا فْ كَمين
واتبرّى منكم وِ جَالي
قال عنْكوا: متْخلّفين
خدْكوا الطّمع والتّعالي
زوّرْتوا للخَدّاعين
زمّرْتوا للشخْلَعالي
زرّيتوا في الطيّبين
رخّصْتوا بالجهل غَالي
ع الكدْب متعوّدين
فاضيين، بيرموا التّبالي
قال إنّكم مدّعين
وتْخينكوا عقلهْ عِيالي
بيْلفّ منْ كلْمتين
مفيشْ توازي و توالي
قال: كنت مزْنوق في دين
ولْقِيت جيوبْهم حلالي
إيه يعني لو قلت (سين)
من عنْترة وْ (صاد) هِلالي
لو جبْت (ياء) قبل (غين)
أو حتى بكّين في مَالي
ملْهُمش في الْ كام وفين
مالْهم .. بقى حُرّ مالي!
فجأة اتْنفض: كدّابين
لفّيت عليهم حِبالي
أدّوني (مانو) وْ (سمين)
عملْت ميّت أصالي
وعْرفت أدْخل منين
مذكّرات كدْب ٱلي
يمْضوا وِلوْ كان ع طين
عايزين حواوشي احتلالي
والعقدة متدرْوشين
مش مكسوفين .. مش في بالي
رديت عليه: إنت مين؟
غمّض وقال: (عِيزرا) خالي
بيْدرّب الموْهومين
ع الدقّ جوّه الطّبالي
بيّاع هوى بْذمّتين
حلّاق ودبْلة وْ ضلالي
لوْلبْ وصوت عرّافين
واللّوبي ده .. شغل حالي
في الندْوة يسكن عَرِين
والتوب مرَقّع وِ بَالي
لو خبّى ضفْر الإيدين
هتْشمّ ريحة الدّوالي
برّقت .. قال: ثانيتين
ندَهْ على الشيف جِبالي
اتشقّ سقْف الدّومين
واتْبخَر ابن السّحَالي
