كشفت الإعلامية سناء منصور عن كواليس بدايات الفنان أحمد حلمي منذ عمله كمساعد مخرج في التلفزيون وصولا إلى عمله كمذيع وحتى نجوميته في الفن.
وأوضحت سناء منصور أن برنامج «لعب عيال» كان السبب في نجومية أحمد حلمي ودخوله عالم التمثيل رغم أنه في البداية كان رافضا لتقديم البرنامج.
وتابعت سناء منصور قائلة: «في الحقيقة أنا معنديش ولاد ولكن في الإذاعة والتلفزيون عندي أولاد كتير، وأنا رئيسة القنوات الفضائية المصرية جاني أحمد حلمي علشان يشتغل مهندس ديكور لأنه خريج قسم الديكور في الفنون المسرحية ولكن طلب مني يكون مساعد مخرج وبالفعل أصبح مساعد مخرج».
واستكملت خلال برنامجها «هاحكيلكم الحكاية» موضحة كواليس عمله كمذيع لأول مرة قائلة: «في يوم طلبت من فريق كان أحمد حلمي واحد منهم يعملوا لي فكرة عن مسابقات الأطفال ونزلوا يعملوها وجابوا ليا الشغل ولكن معجبنيش التنفيذ».
وأضافت :«وبعد شهرين لقيت أحمد حلمي داخل عليا وقال لي عملت حاجة شبه الفكرة بس طورتها وجاب لي الشريط ولما بدأت اتفرج عليه لقيت نفسي بكركر من الضحك فسألني عجبك قلت له ده جنان وهايل وهو ما كانش مصدق نفسه وكانت حاجة مختلفة وفي لحظتها سميناه لعب عيال».
وأوضحت قائلة:«أحمد ساعتها طلب مني يكون مخرج البرنامج .. قلت له أنت هتكون مذيع.. قال لي أبدا مش هطلع على الشاشة.. لكني أصريت وقلت له دي فكرتك ومحدش هيعرف ينفذها غيرك».
واختتمت حديثها قائلة: «وبعد شهر واحد من وقوفه قدام الكاميرا مدة البرنامج بقت 20 دقيقة وكان بييجي عليه إعلانات نصف ساعة بسبب النجاح الكبير اللي كان محققه وبعدها شريف عرفة شافه وعجبه واستأذن أنه ياخده يلعب دور في السينما وكنا في منتهى السعادة أن ولد من نجومنا الجداد يكون نجم سينمائي».
اقرأ أيضا | سناء منصور تسترجع ذكرياتها عن حرب أكتوبر
