يا أمه بتودع شعوبها
شعب.. شعب
يا أمه بتكفن جروحها جوه خوفها
القتيل بالطبع انت
واللي قاتل برضو انت
بالسكوت من خوف ورعب
يا أمه تاهت بين ضلوعها
إيه باقي لك من تاريخك
إيه بقى لك من شموخك
لما يصبح لون جهادك في الزمن ده
حب استنكار وشجب
إيه بقى لك
لما شعب يموت فطيس
لما يبعث ميت رساله وهو بيطلع في روحه
أنقذونا....
أنقذونا باللي غالي وبالرخيص
ميت رساله جوه حلمه وفي طموحه
أنقذونا....
فاكر ان الأمه لسه جسم واحد
فاكر ان الأمه لسه صف واحد
رغم إن الأمه صارت ألف حته وألف واحد
ميت رساله أنقذونا
يجي رد الأمه ينهي ع الضحيه
يجي رد الأمه كلمه مستحيه
كلمه نابعه م الظروف
كلمه باكيه طاطيه راسها
جوه جمله من الحروف
أعذرونا
مش بإيدنا أعذرونا
وعد منا مش هننكر
وعد منا مش حنشجب
راح يكون في المره ديه
رد فعل جديد علينا
راح يرجع هيبه ضايعه
رد رادع للأعادي
رد يضرب فوق رقابهم والأيادي
احنا هنجمع شعوبنا
إللي باقي من شعوبنا
كل جمعه في المساجد
بعد خطبه تعيد حماسهم
للي راكع واللي ساجد
خطبه فت تكون مقاسهم
والدعا لولاة أمورهم
إللي لازقين في الكراسي
واللي حوطونا بمآسي
إللي فاكر شعبه واللي لشعبه ناسي
كل جمعه في المساجد
راح نصلي على اللي مات
فرض غائب
رأي صائب
رأي أمه تضيع شعوبها
جوه خوفها
رأي صائب
واصل برده كل 100 من السنين
فوق في راسها
يجي مين يحيى لنا دين
جه عدو المره ديه
جه عدو يتم لنا في العقيده فرض ناقص
أسمه غائب
فرض سادس في الصلاه
فرض سادس بعد حجه
ألف حجه وألف حجه
للوهن جوه في قلوبنا
ألف خيبه وألف خيبه...
على اللي بيتاجروا في دمانا
بيبيعونا عشان حياتهم
إللي من غيرنا نهايتهم
ألف خيبه على الديابه
حولونا للوحوش جوه غابه
ديب بيضحك ع الرعيه
ديب فريسه للتعالب
ديب مصمم رغم خيبته انه غالب
ألف فرض وفرض غائب
كل ساعه كل ثانيه
ع اللي ماتوا ع اللي عاشوا
ع اللي لسه مولودين...
جوه الكفن
.من غير معارك مهزومين
على المقتولين جوه البطون
وجوه صلب الرافضين
عيشة المذله والوهن
نفسي مره
واقفه جاده
واقفه واحده
نفسي مره نصحى مره
ويصحي جوانا الغضب
نفسي مره يوم نصلي
على بيبيعوا في وطنا
فرض غائب
