حقق الفنان مروان يونس نجاحا كبيرا في حكاية "عيشها بفرحة" من مسلسل 55 مشكلة حب للدكتور مصطفى محمود، والتي يتم عرضها عبر شاشة ON.
"بوابة أخبار اليوم" حاورت مروان يونس للحديث معه عن كواليس دوره في حكاية "عيشها بفرحة" وعن سبب اتجاهه للفاشون الفترة الاخيرة سنعرفها في الحوار التالي.
كيف جاء ترشيحك لحكاية “ عيشها بفرحة"؟
وقال تم ترشيحي عن طريق شركة الانتاج وقريت اول حلقتين بس لان الورق مكنش كامل وانا عجبني جدا جدا فكرة اني اقدم دور مخرج لاني اتعاملت مع مخرجين كتير عشان كدة كنت سعيد بالدور وحاسس انه سهل".
ما الذي جذبك في الشخصية؟
الشخصية جذبتني لان فيها ميكس حلو بين الجد والكوميدي وده ساعدني اني اقدمها بالطريقةدي ومن الصعب انك تلاقي مخرج عمل عصبي ومذاكرة الدور سهل جدا بالنسبالي".
هل كنت متوقع ان الشخصية تتصدر التريند ؟
مكنتش متخيل ردود الأفعال الى شوفتها من الجمهور خصوصًا إن المسلسل بيتصور وبيتم عرضه في ظروف صعبة جدًا وسعيد إن دورالمخرج، نال إعجاب الجمهور وحصد ردود فعل كبيرة،وتلقيت إشادات واسعة من الجماهير مكنتش متخيلها انا لحد دلوقتي مخضوض،لان عدد حلقاتها صغير لكن استاذ البير مكرم كان متوقع وكنت لما بقول افيه يقولي انه هيبقى تريند
حدثنا عن كواليس العمل ؟
الكواليس ممتعة وفريق العمل كله راقي في تعامله ومش منفسنين خالص وده ساعدنا جدا ان العمل ينجح.
ما رايك في المسلسلات ال ١٠ حلقات وما ذا تفضل هى ام ال ٣٠ حلقة؟
المسلسلات العشر حلقات بقت ممتعة لانها بتساعدنا اننا نوصل رسالة معينه في وقت قصيرة، بقت شبه حياتنا اوي ، لكن مقدرش طبعا اقول ان المسلسلات ال ٣٠ حلقة وحشة لكن انا بحسها انها مرتبطة برمضان اكتر بقيت اشوف ان ده الروتين المناسب ليها لانه جزء من عادتنا ٣٠ يوم احنا مرتبطين فيهم بمتابعه الحلقة بشكل يومي".
هل يهمك راي الجمهور على السوشيال ميديا وبتتأثر به ام لا؟
طبعا بهتم براي الجمهور على السوشيال ميديا لكن بحدود، لان الجمهور اصبح عنده وعى ومعرفه وبينتقد بشكل مناسب وبفرح جدا لما ردود الافعال بتكون ايجابية، وردود الافعال الايجابية بتخليني خايف وبفكر في الاعمال القادمة هل هتبقى ناجحة ولا لا وببدأ أفكر كتير
ما سبب دخولك مجال الفاشون؟
انا عملت براند بتاع التيشرتات مخصوص عشان اسخر من البراندات العالمية، لان اسعارها مرتفعة جدا ، وهو الحمدلله ماشي كويس جدا وزوجتي هى سبب تشجيعي على الموضوع ده لانها تخصص فاشون وعملت براند باسم " مارڤ"،والنَّاس حبت الموضوع وبقى لذيذ وكوميدي بالنسبالهم وبيهادوا بعض بيه".
حدثنا عن اعمالك القادمة؟
بقدم فيلم دراكو رع هيتم عرضه في شهر ١٢ والفيلم لذيذ جداً بيتكلم عن الفراعنه ولكن عايشين في زمنا الحالي وانا بقدم فيه شخصية سيد وده مدير امن وبلوجر والشخصية كوميدي جدا ، ومسلسل روز وليلى وده اتاجل اكتر من مرة بس هيتعرض الفترة الجاية ، وده بطوله يسرا ونيللي كريم وانا متحمس جدا للعمل ده".
