يا أرض التبر والفيروز
فى قلبك للمصاروة كنوز
وطور سينا وعيون موسي
صور لحضارة ملموسة
وراس سدرك مع محمد
وكاترينا بتتعمد
وفى نويبع وشرم الشيخ
جمال بلدى ماعمره يشيخ
دهب فى سياحة مع طابا
مدن ع الخارطة جذابة
وفى بير العبد حانعيد
رفح روحنا مع ذويد
وسكانك تمللى اصحاب
بهم حانقطع الإرهاب
ومهما الخونة عاشوا فيكى
بروحنا ياسينا نفديكى
يامدخل أسيا من بلدى
يانسمة فى رئى جسدى
راح أنقشلك على جلدى
هرم رابع فى كون أبدى
ميلاده من تراب أرضك
وزاده من عرق٠٠كدك ٠٠
وراسم حلمه على قدك
بطول الكووون مفيش قدك
ياناقشة الحب مادنة وزير
بساط في الريح يلاغى الطير
يافاتحة الحضن خير وكتير
لكل ولادك ٠٠ مدير وغفير٠٠
ياعايقة ياام طرحة حرير٠٠
فردتي الهمة للتحرير٠٠٠
وشيلتي قلوبنا جواها ٠٠٠
تسبح وأنتى جواها٠٠٠
عيون تقرا وتقراها ٠٠
وتقرا (الورد ) وياها ٠٠٠
وقلنا يارب وياها
لجل ترجع المنهوب
صفار الرمل قبل الطوب
وحلم (لزند) راح مصلوب
وتعدل حظها٠٠٠ المقلوب
فى لحظة غدر ماتجدى
ياست الكل يابلدى ٠٠
وبإيديكى مع إيدينا
مسحنا الحزن مانسينا
وقلنا يارب قوينا ٠٠
ننسي ذل مآسينا ٠٠
ونمحي ذكر أعادينا
ونصنع فجر بإيدينا
ويوم الوعد عدينا
وضمينا رمال سينا
وعلينا صوارينا ٠٠٠
وجبنا النصر والزينة
هدية ليكى ولولدى
ياست الكل يابلدى
