تقدم اللاعب أشرف فولة بطل العالم السابق في كمال الأجسام باستغاثة جديدة إلى الدكتور أشرف صبحي وزير الشباب والرياضة بعد عدم تحرك الجهات المختصة لتنفيذ توجيهات الوزير بمتابعة حالته الصحية وإجراء الفحوصات اللازمة تمهيدا لإجراء عملية جراحية بعد مروره بأزمة طبية طارئة.
وقال عبر صفحته الشخصية بموقع التواصل الاجتماعي «فيسبوك» : «أنا بقالي أسبوع تقريبا في اتصالات بس سواء من وزارة الرياضة أو مجلس الوزراء ولكن مفيش أي حاجة بتتحرك على ارض الواقع والله العظيم ده ما صح لحالتي».
وأضاف : «والله العظيم أنا ما كنت ناوي أبدًا أطلب المساعدة من حد أبدًا .. أصحابي وكل الأبطال في اللعبة هما اللي صمموا أطلب المساعدة من البلد والسادة المسئولين وقالولي ده حقك عشان احنا عارفين ظروفك وصلت لحد فين في رحلة علاجك وفي ظل الظروف الاقتصادية الصعبة اللي كلنا بنمر بيها».
وتابع اللاعب اشرف فولة: «كنت طمعان في معالي دولة رئيس الوزراء الدكتور مصطفى مدبولي والدكتور أشرف صبحي وزير الشباب والرياضة أن لما هتوصلهم حالتي ويعرفوا إني بطل من أبطال العالم في لعبة كمال الأجسام ورفعت أسم مصر كثير في محافل دولية كبيرة منها العالم وافريقيا والبحر المتوسط وعمري ما في جهة صرفت على تجهيزي من يوم ما بدأت اللعبة دي ان محدش هيتاخر وهيقفوا جامبي في اللي جاي في رحلة مرضية صعبة على أي حد».
واختتم اللاعب قائلا : «أنا دلوقتي بس عاوز اعرف راسي من رجلي هل هكمل طريقي زي ما انا ومعايا ربنا ولو حتى هبيع كل اللي ورايا واللي قدامي ولا البلد هتقف معايا كا ابن من ابنائها، انا نفسي عزيزة جدًا علي فوق ما حد يتصور والكلام ده مش عشان احصل على مساعدة شخصية من اي حد انا بطلب البلد ده اللي انا ابنها ولما اب او ام يشيلوا ابنهم مش عيب ولكن انا مش عاوز مساعدة مادية من حد انا عاوز رعاية بس من بلدي اسوة بـ اي فنان او مطرب بيبقى في زنقه والبلد مش بتتاخر عنه».
وكان الدكتور أشرف صبحي، وزير الشباب والرياضة، أعلن مؤخرا إطلاعه على كافة التفاصيل المتعلقة بالحالة الصحية للاعب كمال الأجسام، موجهًا اللجنة العليا للرعاية الطبية للرياضيين، بضرورة توافر كل ما يلزم لعلاجه، والتعرف على أبرز ما تحتاجه حالته من رعاية طبية، ومتابعته لتطورات الحالة الصحية خلال الفترة المقبلة.
ووجه صبحي بسرعة التواصل مع اللاعب وإحالة الموضوع للجنة العليا للرعاية الطبية للرياضيين التي تواصلت مع اللاعب، وتبين أن اللاعب يعاني من فشل كلوي ويحتاج إلى للعرض على أساتذة أمراض الكلى للتقييم ووضع الخطة العلاجية اللازمة تمهيدًا لإجراء جراحة زراعة الكلى.
