حلمت كتير يراودني ما راودنيش
بهيأ له فى لحظة طيش
وهميت بيه ... ماهمش بيا ولا مرة
واعيد الكرة من تاني
ولسايا براود حلمي عن نفسه
قلوب فى هوايا بتنافسه
وتتمنى ترجع حلمي تاني الجب
وتبكي النسوة علشاني
يا وجع القلب داب م الحب
هرب من حضني راح السجن
ياعيني عليا حلمي عزيز
أنا طول عمري م الدراويش
باهتف للأمان يحيا
وسقف الحلم إني احيا
وأدنى الحلم إني أعيش
قسيت على نفسي بَحاسِبها
وتقسى الدنيا ما احْسِبْها
واقيس الدنيا عرض وطول
ناديت الدنيا تيجي عندي
أنا اتغيرت مش معقول
طلبت حمام ولحم نعام يكون مندي
مادام تتوفر اللحمه
ناخد بروتينا ليه م الفول
فقلت أخالف الزحمه
أتاري الحلم مش عاجب
لاقيت الدنيا بتكشر
ورافعة الشفه والحاجب
صرخت وباطلب الرحمه
ف طار الحلم من إيدي
قالت لي م الأمل زيدي
وعبي الأمنيات قفه
وغرتني فى يوم عيدي
زيدي وطببي الكفه
لاقتها كمان بتتحدى
وبالسبابة كت مادا أوام عيدي
ناديت ع الحب وراضيته
ساقيته عصير وهديته
وقمت أهم وأحايله
وقلت أقفل الأبواب
وانشن فيه بسهم شباب
يوقع لي نصيب حبوب
وسرب حمام من الأصحاب
قطعت قميصه قديته
قميص دايب مالوهش جيوب
قديم معيوب
لاقيت الهم راح مفروط
وبايِن حب م المشروط
صحيت من حلمي بتكفى
فى نفس الحفرة ليه مربوط
زادتني من الوجع والنوح
وقالت خدتِ عشق الروح
دا عشق الروح مالوش أخر
فصحي الحلم يتاخر
وعيشي فى برجك العاجي
هتمشي السكة للأخر
هدبأ لك حبيب واجي
لأجل عيونك الحلوين
وضحكة جنان بغمزتين
تحقق لك أماني كتير
وحق الجبر عينتك
إمام للصبر والصابرين
