العلاقات بتحتاج بذل جهد وعطاء وتضحيات.. محتاجة مننا تواصل وتفاهم وتغافل
جوزى مش بيحبنى بالطريقة اللى تريحنى.. بيحبنى بطريقته هوّ مهما حاولت أوضحله إيه احتياجاتى بالظبط.. كل اللى ببقى مستنياه منه كلمة حلوة بعد يوم شغل طويل، اسمع منه « تسلم ايدك» بعد ما أعمله أكلة حلوة، لكنه دايماً شايف انى بتدّلع وانه ملوش فى الكلام الحلو المتزّوق.. شايف ان طالما بيصرف علينا وماديًا مش بيقصر يبقى مليش حق أطلب منه أى حاجة تانى.
كل مشكلتى معاه ان كل تعاملاته معايا جافة وتفتقر للمشاعر والأحاسيس وأنا الحاجات دى بتفرق معايا فوق ما تتخيلى..لدرجة انى بفكر فى الانفصال من كتر ما بنتخانق ومن كتر ما بحس انه مش فاهمنى ولا عايز يسمعنى.. ممكن تساعدينى برأيك، هل أنا مزوداها لما بطلب منه يقولى كلمة حلوة طالما بيصرف عليا ومش مُقصر فى الماديات؟ أنا تايهة بجد وزى ما أنا مش مرتاحة هو كمان مش مرتاح..
عزيزتى أستاذة «م»
استفسار حضرتك يتمحور حول موضوع مهم تكلم عنه باستفاضة الكاتب الأمريكى جارى تشابمان فى كتابه الأكثر مبيعًا «لغات الحب الخمسة»
وضح تشابمان ان من أهم أسباب الخلافات بين الزوجين وتفاقم الفجوة بين أفراد الأسرة الواحدة ان كل فرد مش فاهم لغة الحب الخاصة بباقى أفراد الأسرة..فبيتعامل من منظوره الشخصى وبوجهة نظره فقط دون الالتفات لاحتياجات الآخرين.
وتعريف لغة الحب انها الطريقة اللى الشخص يرغب ان الآخرين يعاملوه بيها لإنها بتريحه وبتحسسه انه شخص محبوب ومقبول ومرغوب فيه..
تشابمان أوضح ان نجاح العلاقات يعتمد على اننا نحب الناس بالطريقة اللى هما محتاجينها مش بالطريقة اللى تريحنا احنا ولا بالأسلوب اللى احنا شايفينه الأنسب من وجهة نظرنا..
وسرد ان فى خمس لغات للحب أولها:
كلمات التوكيد Words of affirmation
أو ما يطلق عليه «الحب المنطوق» واللغة دى منتشرة وسائدة عند معظم الستات..معناها ان الشخص اللى لغة حبه كلمات التوكيد بيحس انه محبوب لما بيسمع كلمات اطراء وتشجيع ومدح من اللى حوليه..
فا حضرتك كما ذكرتى فى رسالتك واضح جداً ان كلمات التوكيد هى لغة الحب الخاصة بيكى واللغة السائدة على باقى اللغات.
حضرتك كل اللى يفرقلك تسمعى تشجيع من جوزك فى شغلك، تسمعى كلمات شكر على مجهودك فى البيت مع الولاد، تسمعى مجاملة حلوة على شكلك أو لبسك.. ولو جوزك استخدم لغات حب تانية معاكى مش هتحسى بالرضا والاشباع العاطفى الا لما يُشبع احتياجك بإنك تسمعى كلمتين حلوين منه.
واللغة دى ممكن تلاحظها فى طفل من أطفالك، لو كتبتيله فى ورقة وسط السندويتشات « انا بحبك/ انت طفل مميز / انا فخورة بيك» هتلاقيه راجع من المدرسة طاير من الفرحة، على عكس طفل تانى ممكن الرسالة نفسها لا تلفت انتباهه إلا لحظيًا..
تانى لغة من لغات الحب قضاء الوقت مع الأشخاص اللى بتحبيهم Quality time:
والأشخاص اللى دى لغة حبهم بيفرق معاهم جدًا قضاء وقت خاص بدون مشتتات مع حبايبهم، مثلًا تتفرجوا على فيلم سوا بتركيز ومفيش حد ماسك موبايله أو مشغول بحاجة تانى عن مشاهدة الفيلم.. الشخص ده عايزك تركز معاه بكل حواسك ولذلك ممكن تجدوا طفل من أطفالكم كل اللى بيفرقله تقعدوا تلعبوا معاه بلعبة قديمة بس وانتوا مركزين معاه أكتر ما يفرقله انكم تشتروله لعبة جديدة وغالية.. هو هدفه انكم تتواجدوا معاه بكل وجدانكم ومشاعركم ولو اتلهيتوا عنه ممكن يدخل فى نوبات غضب ويحس بالحزن الشديد لإنه وصلته رسالة عدم الحب بسبب انشغالكم عنه.
ثالث لغة الأعمال الخدمية Act of service:
بمعنى آخر الحب أفعال.. لا أقوال
واللغة دى منتشرة جدًا بين الرجال، تلاقى جوزك أكتر حاجة تفرّحه انك تشيلى من عليه حِمل، تريحيه من مشوار تقيل على قلبه تعبيرًا منك عن حبك ليه.. تغسليله عربيته فا يحس باهتمامك بتفاصيله.. تصلحيله الساعة العزيزة عليه اللى كل مرة بينسى يصلحها.. وغيرها من الأفعال اللى بتختلف حسب شخصية كل انسان..
ومش معنى كلامى ان اللغة دى مقتصرة على الرجال، ممكن جدًا تتواجد فى الستات وليها أمثلة كتير.
رابع لغة تلقى الهدايا Receiving gifts:
الأشخاص اللى الهدايا لغة حبهم بيهتموا جدًا بالتفاصيل وبيركزوا فى المجهود المبذول فى الهدية أكتر من اهتمامها بسعرها.. بيفرق معاهم الشخص ده فكّر قد ايه وتعب ازاى عشان يلاقى هدية تسعدهم ويحبوها..
عشان كده تلاقى زوجة يفرقلها جدًا لو جاتلها ميدالية محفور عليها اسمها واتعملتلها مخصوص وزوجة تانية الميدالية دى ولا تفرقلها لإنك اخطأت فى تحديد لغة حبها وهتحس ساعتها ان كل مجهودك اترمى على الأرض.
خامس لغة التواصل الجسدى Physical touch:
واللغة دى منتشرة جدًا بين الستات والأطفال.
بيفرقلهم الأحضان والطبطبة وبتأثر فى نفسيتهم جدًا..
وأكيد انت لاحظت ان فى حد من ولادك بيفرقله الحضن جدًا وولد تانى مش بيحب حد يلمسه، ده مش عشان هو عاق أو شخص جاحد ولكن لغة حبه مش التلامس والتواصل الجسدى زى أخوه وده ينبهنا اننا ما نضغطش على الولاد فى جزء الأحضان لو مش بيحبوها لان ده لا يعيبهم فى شىء ولكن لغة حبهم مختلفة.
طيب ايه وجه الاستفادة بعد ما اتعرفنا على لغات الحب الخمسة؟ وهل فعلًا بتفرق فى تحسين العلاقات؟
تخيل ان لغتك الأم هى اللغة العربية وشريك حياتك مش بيعرف يتكلم الا اللغة الفرنسية، هل هتنجحوا فى التواصل مع بعض مهما كانت درجة الحب اللى بينكم؟
الإجابة معروفة.. العلاقة دى هتفشل والحب لوحده مش هيكون كافى لتخطى حاجز اللغة وانعدام التواصل اللى بينكم.. فالحل ساعتها انكم انتوا الاتنين تتعلموا أساسيات لغة بعض بشكل مبسط وبشكل يضمن أبسط درجات التواصل إلى ان تتقنوا اللغتين وتقدروا تتواصلوا بالشكل الكافى.
قيسوا ده بالظبط على لغات الحب..
لما الزوج والزوجة يجهلوا كل طرف بيحب ايه وبيحب يستقبل الحب ازاى فكل الجهود المبذولة من الطرفين يا اما هتكون مُهدرة بشكل كامل أو هتسعد شريك حياتك لكن بقدر بسيط لا يُشبع احتياجاته..
وهتبدأوا تحسوا انكم مش فاهمين بعض، مش حاسين ببعض، والحب اللى كان بينكم بيختفى تدريجيًا بسبب عدم اشباع الاحتياجات..
عزيزتى أستاذة «م» ابحثى عن كتاب لغات الحب الخمسة وأنصحك بقراءته وفى قعدة على رواقة اشرحى أنواع الحب الخمسة لزوجك وتناقشوا فى توقعات كل واحد منكم من التانى وصارحوا بعض باحتياجاتكم بكل وضوح..
وفى اختبار على موقع اسمه 5lovelanguages.com
تقدروا تعملوه سوا وهيظهرلكم لغة الحب السائدة عندكم وفقًا لإجاباتكم وهيعرفكم نسب باقى لغات الحب عندكم..
طبقوا الاختبار ده على أولادكم كمان وهتتفاجأوا انكم ممكن تكونوا مخطئين فى نوع الحب اللى بتقدموه لولادكم طول السنين دى بس للأسف هما مش عارفين يعبرولكم عن لغة حبهم بشكل واضح..
عزيزتى «م» العلاقات بتحتاج بذل جهد وعطاء وتضحيات.. محتاجة مننا تواصل وتفاهم وتغافل..
ومشكلة حضرتك هتتحل بسهولة لو صارحتى شريك حياتك بمتطلباتك وهو صارحك باحتياجاته..
الرجالة بوجه عام بتحتاج كلام واضح، ولا يهتموا بالتلميحات..
طبيعة الرجل غير الست..
وأفضل طريقة للتواصل معاهم الطلبات الصريحة بدون اسقاطات..
فى صديقة كل مشاكلها اتحلت مع جوزها لما قالتله انا مستنية منك كذا وكذا وكذا، وبالفعل بقى بينفذهم وعن حب مش تأدية واجب..لأن مخ الرجل لا ينتبه للتفاصيل زى مخ الست..
أنصحك ببذل كل الجهد للحفاظ على شريك حياتك، لأننا ساعات بخطوات بسيطة وبوعى زيادة شوية نقدر نحسّن علاقتنا بحبايبنا بشكل عمرنا ما تخيلناه..
وربنا يصلحلك الحال ويرشدك للصواب..
