تناولت الإعلامية إنجي أنور، مفهوم الرجولة في ظل الأعراف والتقاليد والثقافة الدينية .
وقالت إنجي في مقدمة برنامج "مصر جديدة" والذي تقدمه مساء اليوم الاثنين عبر فضائية etc، في مجتمعاتنا الشرقية مفهوم "الرجولة" من أساسيات الحياة لاسيما في ظل العادات والتقاليد والأعراف والثقافة الدينية والتي تحمل الراجل مسؤولية مضاعفة وتضفي له قيمة مضافة تطلق عليه القوامة.
اقرأ أيضاً .. إنجي أنور: جنازة سعد زغلول الأكبر في تاريخ مصر
وأضافت: صحيح القوامة لها مفهوم ديني في الإساس مرتبط بالراجل ونصوص دينية، وضع لها الدين الإسلامي ضوابط وتعريف مستمد من "القيام بحماية ورعاية وتوفير مطالب الحياة للمرأة" بحكم انها مسؤوليته في الأساس طالما كان قادر عليها.
وأشارت إلى أن مؤشر الرجولة يزيد عند البعض، عندما يقهر الرجل المرأة الموجودة في حياته أو يستبد برأيه أو يسيطر عليها ويتحكم بشكل كامل في كل تفاصيل حياتها، أو أنه يحتقرها ويقلل منها ومن دورها وجهدها وكونها شريكة معاه في الحياة، قولت لكن المؤكد أن لفظ الرجولة مالوش كتالوج واضح محدد ينطبق على كل الناس في كل الظروف.
وتابعت: يعني مثلاً أحد المشايخ الأجلاء اعتبر أن الراجل اللي ما يعلقش على لبس مراته وزينتها ومكياجها عنده أزمة في الرجولة، وبصراحة الفكرة دي في حد ذاتها نسبية وما ينفعش ناخدها في المطلق كده.
وتابعت: أنا أعرف رجالة بتعلق على إن مراته المنتقبة مش بتلبس جوانتي، يعني هي منتقبة وتقريباً متغطية كلها لكنه طالب أنها كمان تلبس جوانتي.
واستطردت: "اللي مراته محجبة ممكن يعلق على إن الحجاب مش مغطي كل شعرها أو إن فيه خصلة شعر خرجت منه، واللي بتلبس بنطلون جوزها أو أخوها أو أبوها أو حتى ابن عمها ولا حتى مندوب التوصيل ممكن يعلق هو البنطلون ضيق ولا لأ.
وأشارت: بعض الرجالة بتشوف ده نوع من أنواع الحماية.. وفيه ناس بتمارس ده لمجرد التسلط".
وتسألت لكن هل الموضوع يوصل إن الراجل اللي ما يعلقش على لبس مراته يبقى منزوع الرجولة؟.. مظنش، حط ده على مسطرة لبس الستات في مصر.. ممكن تنزع الرجولة كده عن ناس كتير جداً.. لو طبقنا نظرة واحدة على كل الرجالة.
وقالت: "بصراحة برضو مع كامل احترامي لحق الراجل في حماية الستات اللي في حياته بالتعليق على هدومهم، الرجولة مش بس إني اتحكم في لبس مراتي أو أختي، أنا عارفة إن فيه ستات أحيانا بتتضايق لو جوزها ما علقش على لبسها وبتحس انه مش بيغير عليها.. وممكن تحطه في اختبارات كمان".
وأكدت إنجي أن الرجولة ليها أشكال كتير، الرجولة معناها النفقة وتأمين احتياجات العيلة.. لكن لو الراجل ظروفه متعثرة ليس له علاقة بالرجولة، الراجل البخيل في نظر زوجته رجولته منقوصة.
وأضافت أن الرجولة معناها أني أوفر الاستقرار لأهل بيتي، اني أسمع مراتي أو بنتي أو أختي وأحسسهم بوجودي، إني أشارك في تربية أولادي، أخطط لمستقبلهم، وأعلمهم كويس، وأُمن لهم المستقبل ليس فقط بالفلوس، لكن ممكن المستقبل يتأمن بالوعي والأخلاق، اني أعرفهم معني الحياة.. وتأهيلهم لبكرة".
وأضافت: "أنا من وجهة نظري مدمن المخدرات اللي بيعرض حياة أهل بيته للخطر.. واللي بيعيش من عرق مراته وعياله وبيكسل يتعب نفسه منزوع الرجولة، إسأل مليون واحدة ست يعني ايه الرجولة هتلاقي الإجابة المشتركة هي الأمان والسند وتحمل المسؤولية، مفيش ست مهما كان دخلها أعلى من دخل جوزها لو هي شغالة أو عندها ورث ولا ملك تحب أنها تبقى هي اللي بتصرف على نفسها".
واختتمت: "الحكاية هنا مش قصة فلوس، لكنها حكاية إحساس إنها مسؤولية جوزها اللي له حق القوامة بعد المشاركة والطاعة بعد الحوار، بحر الرجولة أوسع بكتير من إننا نحصره في "ايه ده يا مدام انت لبسك ضيق أو مكشوف ولا قصير" ، الغيرة وفرض السيطرة نقطة في بحر الرجولة، وما ينفعش أبل صباعي من البحر وأقولك أنا سباح".
